Túrkistan tórinde bastaý alatyn merekelik is-sharalar 14 naýryzdan bastalady.
Oblystaǵy etnos ókilderimen birlesken kontserttik baǵdarlamalar uiymdastyrylyp, ulttyq taǵamdar tartý etiledi. Óńirdegi kitaphanalarda «Meniń elim kúndei nurly Qazaqstan», «Naýryz jyl basy» atty taqyryptarda kitap kórmeleri ótedi. Bul týraly Túrkistan Óńirlik kommýnikatsiialar qyzmetinde ótken brifingte oblystyq mádeniet jáne tilderdi damytý basqarmasy basshysynyń orynbasary Asylhan Temirhanuly málimdedi.
«15 naýryz «Taǵzym kúnine» orai dúnieden ótken azamattardyń rýhyna quran baǵyshtalyp, qurbandyq shalynady. Bul kúni merekeli, berekeli Naýryz toi», «Naýryz – jyl basy» atty mádeni is-sharalar atalyp ótiledi. Sondai-aq, «Din imandylyq uiytqysy» atty taqyryptarda kezdesý keshteri ótetin bolady» - dedi A.Temirhanuly.
16 naýryz «Tazarý kúni» dep belgilengen. Osyǵan orai, aýdan qalalarda jalpyoblystyq senbilik ótedi.
Al 17 naýryz «Kóktem shýaǵy kúnine» bailanysty sporttyq oiyndar kieli Túrkistan qalasynda saǵat 10-00 den keshki 18-00 ge deiin jalǵasady.
18 naýryz «Kóktem órnekteri kúni» dep atalyp, qoǵamdyq kólikter men memlekettik mekemelerdi jáne kóshelerdi merekege sai bezendirý qolǵa alynady.
19 naýryz «Balalar kúninde» tsirktik jáne teatrlandyrylǵan qoiylymdar, ulttyq sporttyq oiyndar uiymdastyrylady. Sonymen qatar, merekege orai tátti toqashtar men balmuzdaq taratylady dep josparlanýda.
20 naýryz «Birlik kúni» aiasynda ardagerlerdi merekemen quttyqtap, dastarhan jaiylady.
Al 21 naýryz «Naýryz» merekesi kúni oblys ákiminiń qatysýymen saǵat 10-00 de «Qosh keldiń, Áz Naýryz!» teatrlandyrylǵan merekelik is-sharasy ótedi. Sol kúni 19-00 de «Esimhan» alańynda gala kontsert qoiylady.
22 naýryz «Naýryz» merekesi juma kúni Túrkistan oblysynda merekelik is-sharalar, jalpyhalyqtyq serýender jáne kontserttik baǵdarlamalar men ulttyq sporttyq oiyndar uiymdastyrylatyn bolady.
