Búgin Túrkistan oblysynyń jurtshylyǵy Ulystyń uly kúnin Túrkistan qalasynda toilady. «Esim han» alańynda ótken merekelik sharada óńirdiń tanymal juldyzdary, stýdentter men mektep oqýshylarynan quralǵan jalpy 2000-ǵa jýyq adam óz ónerlerin kórsetti, dep habarlaidy "Ult aqparat".
Saltanatty jiynǵa oblys ákimi Ómirzaq Shókeev arnaiy qatysyp, óńir turǵyndary men qonaqtaryn aitýly merekemen quttyqtady.
«Túrkistan oblysynda Naýryz merekesi 14 naýryzdan bastaldy. Oblysymyzda ár kúnge ártúrli at berilip, maǵynaly ári mazmundy is-sharalar, jalpyhalyqtyq serýender ótti. Kóshetter otyrǵyzylyp, qalany kórkeitý jumystary jandandy. Ulttyq kiim men dástúrli án-kúilerimiz nasihattaldy. Búgingi merekeni paidalana otyryp, barshańyzdy Túrkistandy gúldendirýge úles qosýǵa shaqyramyn. «Yntymaq júrgen jerde, yrys birge júredi» degen maqal bar. Birligimiz myqty, elimiz tynysh bolsa, Túrkistanymyzdyń keleshegi jarqyn bolatyny sózsiz. Barshańyzdy Ulystyń Uly kúni - Naýryz merekesimen shyn júrekten quttyqtaimyn», - dedi Ómirzaq Shókeev.
Merekelik sharada jyl basynyń bastalýyn kórsetetin teatrlandyrylǵan qoiylym qoiyldy. Sondai-aq, etnoaýylda oblystaǵy aýdan-qalalar kiiz úiler tigip, ulttyq taǵamdardan dastarqan jaiyldy. Jurtshylyqqa 500 keli baýyrsaq úlestirildi. Qonaqtar úshin 2000 litr naýryz kóje daiyndalyp, 1,5 tonna palaý basyldy. Odan bólek, qolónershiler jasaǵan túrli ulttyq buiymdardan kórme uiymdastyryldy.
