Túrkistan oblysynyń bas memlekettik sanitar-dárigeriniń jańa qaýlysy negizinde birshama shekteýler jeńildetilip, áleýmettik nysandar iske qosylýda, dep habarlaidy Óńirlik kommýnikatsiialar qyzmetiniń baspasóz qyzmeti.
Máselen, biyl lagerlerge oqýshylardy qabyldaý 15-30 maýsym aralyǵynda bastalady dep josparlanýda. Bul týraly óńirlik kommýnikatsiialar qyzmetinde ótken brifingide oblystyq Adami áleýetti damytý basqarmasynyń basshysy Raqymbek Jolaev málim etti.
Onyń aitýynsha, biylǵy jaz mezgilinde qala syrtynda 23 saýyqtyrý lageri jumys isteidi dep josparlanǵan. Onyń ishinde 8-i memlekettik, 15-i jeke menshik. Biyl oblys boiynsha 1-10 synyp oqýshylarynyń jalpy sany – 416 086 oqýshyny quraidy. Óńirdegi 23 saýyqtyrý lageri 32 myńnan astam balany qabyldaidy.
«Túlkibas aýdanyndaǵy «Samal«lagerinde oblysymyzdaǵy 5 balalar úiiniń jetim jáne ata-ana qamqorlyǵynsyz qalǵan 250-ge jýyq tárbielenýshileri jaz boiy demalady. Sondai-aq, Maqtaaral aýdanyndaǵy tótenshe jaǵdai oryn alǵan eldi mekenderdegi 820 oqýshy 15 kúnnen jazǵy demalysqa barady. Olar «Baldáýren-Qapshaǵai» jáne «Baldáýren-Túrkistan» oqý-saýyqtyrý ortalyǵyna, «Saryaǵash» balalar sanatoriiine, aýdandardaǵy «Baldáýren», «Qazyǵurt», «Báisheshek», «Erkejan» saýyqtyrý lagerlerine barady», - dedi Raqymbek Qýatbekuly.
Sonymen qatar, basqarma basshysy oblystaǵy balabaqshalar tek ata-analardyń suranysy men ótinishi negizinde iske qosylatynyn aitty.
«Biyl oblysta 2020 jyldyń 20 naýryzyna deiin 1447 mektepke deiingi uiymdar jumys istedi. Onyń ishinde 1271 balabaqsha, 176 memlekettik shaǵyn ortalyq. Onda 1-6 jastaǵy 153 296 bala tárbielenýde. Jalpy mektepke deiingi uiymdardyń úlesiniń 69%-y jekemenshik. Qaýlynynyń №9 qosymshasynda mektepke deiingi uiymdarda ata-anasynyń mindetti jumysta bolýy shart jáne balalaryna qaraýshysy joq otbasylar úshin jumys isteitin kezekshi toptardy ashý jáne kezekshi toptarmen jumys jasaý algoritmi kórsetilgen. Sondyqtan balabaqshalarda kezekshi toptar ashylýy múmkin», - dedi basqarma basshysy.
Aita keterligi, mektepke deiingi uiymdardaǵy qyzmetkerlerdiń eńbek jalaqysy saqtala otyryp, úilerinde qashyqtan jumystaryn jalǵastyrýda, al, keibiri óz ótinishteri boiynsha kezekti eńbek demalysynda.
