Túrkistan oblysy Keles aýdany Aqjol aýylyndaǵy Sultanbek Qojanov atyndaǵy mekteptiń oqýshylary synypqa simaǵan soń buryn dárethana bolǵan jerde sabaq oqýǵa májbúr. Sebebi tar mekteptiń parta, taqtalaryna deiin eskirip, qiraýǵa shaq tur. Osyǵan bailanysty ata-analar qosymsha ǵimarat taýyp berýdi talap etip, mektep aldyna jinaldy dep habarlaidy KAZ.NUR.KZ KTK telearnasyna silteme jasap.
Telearnanyń dereginshe, Aqjol aýylyndaǵy 600 balaǵa arnalǵan mektep 45 jyl buryn salynǵan. Ábden tozyǵy jetken bilim oshaǵynda qazir myńǵa jýyq oqýshy bar.
Tyǵyryqtan shyǵý úshin muǵalimder kez kelgen buryshta sabaq oqytýǵa beiimdelgen. Tipti, ustazdar bólmesi men birde-bir oryndyǵy joq akt zalyna deiin synypqa ainalyp ketken.
"Kabinet etip jasaǵannyń saldarynan bizdiń mektebimizde zerthana joq jáne arhiv joq. Kitaphananyń arhivi joq. Bárin kabinet qylyp tastadyq. Bizge ázirshe qosymsha ǵimarat salyp berip, keleshekte jańa ǵimarat salynsa", - deidi Sultanbek Qojanov atyndaǵy mektep direktorynyń orynbasary Lýiza Aqbai.
Telearnanyń habarlaýynsha, tipti, oryn bolmaǵan soń buryn dárethanaǵa bolǵan jer synypqa ainalǵan. Ol jerge eden tóselip, taqta ilinip, parta men oryndyqtar qoiylǵan. Mektepte dárethanadan synypqa ainalǵan bir emes, úsh kabinet bar eken.
Degenmen turǵyndar oqý ǵimaratyn keńeitýdiń jolyn da taýyp qoiǵan kórinedi.
Olardyń sózinshe, mekteptiń dál aldynda buryn áskerilerdiń keńsesi bolyp, bes jyldan beri bos turǵan qos qabatty ǵimarat bar. Kópshilik ǵimaratty mekteptiń esebine ótkizip berýin ótinip aýdan ákimine júgingen. Alaida ákim bul jerde pioner lageri ashylatynyn aitqan.
"Ákim pioner lagerin ashamyn deidi. Jekemenshik pioner lageri bizge kerek emes. Dál qazir balalarǵa bilim beretin mektep kerek. Shókelep otyrǵan bala qandai bilim alady? Qazir oqý baǵdarlamasy kúrdeli", - deidi Aqjol aýylynyń turǵyny Gaýhar Joraeva.
Mektep aldyna jinalǵan jurt ákim men bilim bóliminiń basshysyn shaqyrǵan. Biraq olardyń ornyna bólim ádiskeri kelgen.
"Aldaǵy ýaqytta partany, oryndyqty, taqtany – bárin jetkizip beremiz. Naqty qai ýaqytta ákelinetinin bilmeimin. Biraq ol jaqta da jumystar júrgizilip jatyr deidi... Kóremiz, aqyldasamyz, munyń bárin, jaǵdaidy basshylarǵa jetkizemin", - deidi Keles aýdany adami áleýetti damytý bóliminiń ádiskeri Nasyr Smanov.
