Búgin Túrkistan oblysynyń barlyq aýdan, qalalarynda Memlekettik rámizder kúnine arnalǵan merekelik is-sharalar uiymdastyryldy, dep habarlaidy "Ult aqparat".
Qazaqstandyqtardyń Memlekettik rámizderge degen qurmetin arttyrý, óskeleń urpaqtyń patriottyq sanasyn jańǵyrtý maqsatynda uiymdastyrylǵan sharalar barysynda aýdan, qala kóshelerinde tý men eltańbany kótergen avtokólikter sherýi, attar kerýeni, fleshmobtar ótip, barlyq memlekettik organdar men kásipkerlik nysandarǵa týlar ilindi. Sanitarlyq talaptardy saqtai otyryp jergilikti turǵyndar men mektep oqýshylary, etnos ókilderi qatysqan merekelik is-sharalar Qazaqstan Respýblikasynyń Memlekettik Ánuranyn shyrqaýmen óz jalǵasyn tapty.
Oblys jurtshylyǵyna rámizderdiń shyǵý tarihy men beinelerin keńinen nasihattaýǵa baǵyttalǵan beinerolikter ázirlenip, aýdan, qala ákimdikteriniń resmi paraqshalary arqyly keńinen nasihattaldy.
1992 jyly 4 maýsymda Qazaqstan Respýblikasynyń Memlekettik rámizderi resmi túrde bekitilgen bolatyn. El Táýelsizdiginiń turaqtylyǵynyń kepili bolǵan, eldiń birtutastyǵy men tynyshtyǵyna tutqa bolǵan aitýly kúnniń oryn alǵanyna biyl 29 jyl toldy.
