Túrkistan oblysy Saryaǵash aýdanynyń turǵyny qyzyn 17 erkek zorlaǵanyn málimdedi, dep habarlaidy Sputnik Qazaqstan agenttigi.
Áieldiń áleýmettik jelide taraǵan jýrnalisterge úndeýinde qylmyskerlerdiń áli jazalanbaǵany, sebebi olardy politsiia jasyryp otyrǵany aitylǵan. Ol osy is boiynsha jýrnalistik zertteý júrgizýdi suraidy.
Aqparatqa Túrkistan oblysynyń politsiia departamenti túsinikteme berdi.
"Áleýmettik jelide Saryaǵash aýdanynda 17 er adam qyzdy zorlaǵany týraly aqparat tarap jatyr. 2021 jyldyń 25 mamyrynda Saryaǵash aýdanynyń turǵyny politsiiaǵa aryzdandy. Ol 17 jastaǵy qyzyn urlap ketkenin habarlady. Derek Qylmystyq kodekstiń 125-baby "Adam urlaý" boiynsha tirkeldi", - dep habarlady departamenttiń baspasóz qyzmeti.
Keiin politseiler 17 jastaǵy qyzdyń jumysqa ketip, joǵalǵanyn anyqtaǵan. Jedel qyzmetkerler izdeý jumystaryn júrgizip, táýlik ishinde qyzdy taýyp, ata-anasyna qaitarǵan.
Bir aptadan keiin, 31 mamyrda áiel adam urlaý faktisi boiynsha qylmystyq qýdalaýdy toqtatý týraly notariýs kýálandyrǵan aryzben qaitadan politsiiaǵa júgingen.
"10 maýsymda aýyl turǵyny qaitadan politsiiaǵa aryzdanǵan. Bul joly ol qyzyn bir top adam, atap aitqanda, 17 er adam zorlaǵanyn habarlady", - dep tolyqtyrdy politsiia.
Aryz Qylmystyq kodekstiń "Zorlaý" baby boiynsha tirkeldi. Saraptama taǵaiyndaldy.
"Sot-meditsinalyq saraptama zorlyq faktisin joqqa shyǵardy. Sondai-aq jábirlenýshiniń anasy qyzynyń kiimin óz qolymen órtep jibergeni anyqtaldy. Osyǵan bailanysty mamandar saraptama júrgize almady", - dep túsindirdi oblystyq politsiia departamenti.
Búgingi tańda sotqa deiingi tergep-tekserýdi Túrkistan oblysy politsiia departamentiniń tergeý basqarmasy júrgizip jatyr. Saraptama kesheni taǵaiyndaldy. Onyń qorytyndysy boiynsha protsessýaldyq sheshim qabyldanady.
