Foto: ashyq derekkóz
Túrkistan oblystyq mamandandyrylǵan aýdanaralyq sotynda el-jurtty dúr silkindirgen atyshýly iske sot núktesi qoiyldy. Aiyptaý orynynda 71 jastaǵy Keles aýdany Eńbekshi aýylynyń turǵyny otyr. Ol aǵaiynynyń 16 jastaǵy qyzyn qorlaǵany úshin jaýapqa tartyldy, dep habarlaidy Ult.kz.
«Jábirlenýshi men sottalýshy kórshi turǵan. Qyzdyń anasy Astanaǵa, ákesi qaraýyl bolyp mazaratqa ketkende ol qyzdyń úiine urlanyp kirgen. Qyz bala úiinde sińlisimen ǵana qalǵan eken. Sóitip, týysyn qorlaidy. Alǵashqy kúni jasaǵan azǵyndyǵyn ol úsh kún qatarynan jalǵastyrady. Sońynda jetkinshek júkti bolyp qalǵan» - deidi sýdia Dáýren Madaliev.
Kelestegi sumdyq oqiǵa bala dúniege kelgen soń bir-aq belgili boldy. Aýyl jurty dúr silkinip, aǵaiynynyń qyzyn azǵyndaǵan qariiany otbasymen qosa kóship ketýin talap etti. Osydan keiin politsiia kúdiktini qamap, qylmystyq is qozǵaldy.
Kámelet jasyna tolmaǵan balany zorlap, bótenniń úiine urlanyp kirgeni úshin jaýapqa tartylǵan sottalýshy kinásin sol kúii moiyndaǵan joq. Esesine sot meditsinalyq saraptamasy jábirlenýshiden týǵan bala sottalýshynyń urpaǵy ekenin 99,9 paiyzben dáleldedi. Sóitip sot ony 15 jyl 6 aiǵa sottady.
«Atalǵan baptar boiynsha jaza merzimi 15 jyldan 17 jylǵa deiin berilýi kerek edi. Alaida Sot sottalýshynyń densaýlyǵy men eresek jasyn eskerip, 15 jyl 6 ai jaza merzimin taǵaiyndady», - deidi sýdia Dáýren Madaliev.
Eske salaiyq, 2024 jyly bolǵan jaǵa ustatarlyq jaǵdai 2025 jyldyń qazanynda bir-aq belgili bolǵan edi. Jábirlenýshiniń ákesi men sottalýshynyń ákeleri aǵaiyndy. Ári ózderi kórshi turǵan. Olar tergeý kezinde moraldyq shyǵyndy ótep, sotta ol suralmaǵan eken.
