Túrkistan qalasynyń turǵyndary men qonaqtary 29 qazan kúni Kinopark teatrynda otandyq jáne baýyrlas túrki elderdiń mýltfilmderin tegin tamashalai alady, dep habarlaidy QazAqparat.
Túrkistan qalasynda ótetin halyqaralyq ÁMEN Animation Film festivali qala turǵyndary men qonaqtaryna arnap osyndai merekelik tartý jasaidy.
«Biyl úshinshi ret uiymdastyrylatyn halyqaralyq festivalge Qazaqstanmen qatar, Ázerbaijan, Bashqurtstan, Qyrǵyzstan, Ózbekstan, Tatarstan, Tájikstan men Túrkiianyń bilikti mýltiplikatorlary qatysady. Qala turǵyndary men qonaqtaryn «Khanshayim Plaza» ortalyǵyndaǵy Kinopark kinoteatryna saǵat 11.00-de «Muzbalaq», 12.20-da – «Istanbul Muhafizlary», 13.55-te – «Kúltegin» jáne 15.10-da «Mahambet» mýltfilmderiniń kórsetilimine shaqyramyz. 30 qazan kúni animatsiialyq filmder kórsetilimi Halyqaralyq qazaq-túrik ýniversiteti kitaphanasynyń kinozalynda jalǵasady», - dep habarlady festival uiymdastyrýshylary.
Sonymen birge, festival qonaqtary animatsiia salasyndaǵy álemge áigili mamandardyń sheberlik saǵattaryna qatysyp, mýltfilm jasaýdyń qyr-syryn úirene alady. Túrkistannyń Kongress-holl kesheninde eki kún boiy animatsiia salasyndaǵy Ortalyq Aziiadaǵy eń iri festival ótedi.
