Resmi túrde koronavirýs tabylmaǵan Túrkimenstanda oqý jylynyń aiaqtalýyna bailanysty ótetin saltanatty keshter ótpeitin boldy. Álemde koronavirýs indeti órshigen shaqta engizilgen jańa ózgeristerge bailanysty bilik túsinikteme bermedi. Bul týraly Azattyqtyń Túrkimen qyzmeti (Azatlyk radiosy) habarlady.
Agenttiktiń jazýynsha, mektep bitirý keshterin ótkizbeý týraly sheshim 20 mamyrda qalalyq bilim berý departamentiniń otyrysynda jariialanǵan.
Ashǵabat mektepteriniń birinde joǵary synypta oqityn birneshe oqýshy Azattyq tilshisine "muǵalimder bitirý keshteri ótpeidi dedi, biraq sebebin túsindirmedi" dep aitqan.
Azattyqtyń jazýynsha, Ashǵabatta meditsinalyq tekserýden ótý úshin emdeý mekemelerinde kezekke turǵan adamdar kóbeigen. Munyń aldynda úkimet halyqty jappai tekserýden ótkizý týraly josparyn jariialaǵan.
Túrkimenstan - Ortalyq Aziiada resmi túrde koronavirýs tirkelmegen jalǵyz memleket. Biraq táýelsiz BAQ pen ashyqtyqtyń joǵyn alǵa tartqan sarapshylar buǵan kúmánmen qaraidy.
