Foto: videodan skrinshot
Sońǵy kúnderi áleýmettik jeliler men BAQ betterinde amerikalyq tanymal trevel-bloger Konnordyń (@Camperghini) Qazaqstan shekarasyndaǵy qabyldaýǵa kóńili tolmaǵany týraly aqparat qyzý talqyǵa tústi. Lamborghini Urus kóligin avtoúige ainaldyryp, álemdi sharlap júrgen saiahatshy «resmi shaqyrtý alsam da, meni eshkim qarsy almady» dep ókpesin bildirgen edi. Alaida QR Týrizm jáne sport ministrligi bul jaǵdaiǵa qatysty resmi málimdeme jasady, dep habarlaidy Ult.kz.
Bloger ne dedi?
Konnordyń aitýynsha, ony Qazaqstanǵa kelýge birneshe ai buryn shaqyrǵan jáne shekarada saltanatty túrde, ulttyq naqyshta qarsy alýǵa ýáde bergen.
«Bizdi resmi shaqyrǵandaryn bile tura, shekarada "elge ne úshin kele jatyrsyńdar?" dep jaýapqa alǵany óte oǵash kórindi. Bul óte ókinishti, óitkeni men bul eldi álemge jaqsy jaǵynan kórsetkim kelgen edi», — dep jazdy ol óziniń Instagram paraqshasynda.
Ministrliktiń resmi jaýaby
Týrizm jáne sport ministrligi amerikalyq blogerdi vedomstvo tarapynan arnaiy shaqyrdy degen aqparatty resmi túrde joqqa shyǵardy. Ministrlik málimetinshe, vedomstvo qyzmetinde jeke tulǵalardy jekelei shaqyrý tájiribesi joq.
Sheteldik qonaqtar negizinen:
- * Toptyq aqparattyq týrlar aiasynda;
- * Arnaiy týristik qaýymdastyqtar arqyly;
- * Resmi ótinish negizinde shaqyrylady.
Ministrlik ókilderi blogerden eshqandai resmi ótinish túspegenin qadap aitty.
«Kelissóz boldy, biraq kelisim jasalmady»
Bul máselege núkte qoiý úshin «Kazakh Tourism» ulttyq kompaniiasy da túsinikteme berdi. Kompaniia blogermen jeke hat almasý bolǵanyn rastady. Degenmen, ekijaqty kelissózder naqty kelisimge kelmei aiaqtalǵan. Iaǵni, bloger kútken «saltanatty qarsy alý» týraly resmi mindetteme bekitilmegen bolyp shyqty.
«Biz elimizdiń týristik áleýetin tanystyrýǵa nietti jandarǵa aqparattyq qoldaý kórsetýge árdaiym daiynbyz, biraq bul jaǵdaida naqty kelisim bolǵan joq», — deidi «Kazakh Tourism» ókilderi.
«Renish joq»
Konnor Qazaqstan halqyna degen qurmetin joǵaltpaǵanyn, elde dostary kóp ekenin aita kele, shekaradaǵy keleńsizdikke qaramastan saiahatyn jalǵastyratynyn jetkizdi. Ol tipti renjýdiń ornyna shekara mańynda ózderi úshin «qazaqstandyq mereke» uiymdastyryp, bi bilep, kóńil kótergen.
