Tarazda QR kod arqyly jumys jasaityn «Taraz Tour» mobildi qosymshasyn paidalaný boiynsha trening ótti. Treningke Jambyl oblysyndaǵy týristik firma basshylary men qonaq úi, meiramhana, kafeler jáne shipajai qyzmetkerleri qatysty.
Atalǵan qosymshanyń eń tiimdi tusy – oflain rejimde de qoldanýǵa bolady. Iaǵni, týristerge internet jelisi joq jerde de qoljetimdi.
Ázirleýshilerdiń aitýynsha, qosymsha qala turǵyndary men qonaqtaryna aimaqtyń kórikti, týristik oryndary týraly aqparat berý úshin jasalǵan. «Play Market» pen «App Store» qosymshalary bar barlyq smartfondarǵa júkteýge múmkindik bar. Sonymen birge «keńeitilgen» rejimde Jambyl óńiriniń kórikti jerleri týraly baiandaityn aýdio-video nusqaýlyqtarmen qamtamasyz etilgen.
«Tsifrly Qazaqstan» baǵdarlamasy aiasynda iske qosylǵan «Taraz Tour» mobildi qosymshasy týristerge qonaq úi, sanatorii, meiramhanaǵa tapsyrys berýge múmkindik beredi. «Almaty-Taraz-Shymkent» tas joly boiynda ornalasqan qalaǵa kire beristegi mańdaishaǵa retransliatorlar ornatylǵan. Sáikesinshe qalaǵa kirgen mashinalarǵa radio arqyly avtomatty túrde «Qosh keldińiz» sózi men mobildi qosymsha arqyly aqparat jiberiledi. Sonymen qatar, ornalasqan jeri, baǵyty men mekenjaiynǵa qalai jetýge bolatyny baza arqyly kórsetiledi. Sondai-aq, qosymshany qoldanýshy pikir qaldyryp, óz oiyn bildire alady. Bul týristik indýstriiany odan ári damytý úshin týristerdiń qyzyǵýshylyǵyn baqylaýǵa múmkindik beredi», - deidi Jambyl oblystyq týrizm basqarmasynyń basshysy Qarlyǵash Aralbekova.
Onyń aitýynsha, mobildi qosymsha gid kómeginsiz aimaq nysandarymen tanystyryp, marshrýt jasaýǵa, tarihi nysandar týraly málimetter berýge jaǵdai jasaidy.
Mobildi qosymsha qazaq, orys, aǵylshyn, túrik jáne qytai tilderinde qyzmet kórsetedi. Onda ornatylǵan arnaiy interaktivti karta men navigator kómegi arqyly týristerge eń jaqyn jerdegi kórikti jerler, qonaq úiler men tamaq satatyn oryndardy ońai tabýǵa bolady. Aimaqtaǵy 33 týristik jerde nysan týraly aqparat pen QR kod ornatylǵan.
