Týrbiznes airyqsha kútip otyrǵan jeńildik sharalarynyń biri - blokpostardyń alynýy. Bul týraly QR Mádeniet jáne sport ministrligi Týrizm indýstriiasy komitetiniń tóraǵasy Dastan Rysbekov aitty, dep habarlaidy QazAqparat.
«Tótenshe jaǵdai alynyp tastalǵannan keiin karantindik sharalarlardyń jeńildetile bastaǵanyna kýá boldyq. Kóptegen sala, onyń ishinde týrizm salasy da óz jumysyn birindep bastap jatyr. Óńirler arasynda áýe jáne temirjol qatynastary qaita jandanýda. Degenmen, jumys úshin áli de tolyq múmkindik bermeitin birqatar kedergi bar ekendigimen de kelisemin. Týrbiznes airyqsha kútip otyrǵan jeńildik sharalarynyń biri - blokpostardyń alynýy. Bul problema taiaý ýaqytta óz sheshimin taýyp qalady. Ol úshin karantindik sharalardy bárimiz saqtaýǵa tiispiz», - dedi komitet tóraǵasy Ortalyq kommýnikatsiialar qyzmetindegi brifingte.
Onyń atap ótýinshe, Bas sanitarlyq dárigerdiń №37 qaýlysyna sáikes, týristik operatorlar men týristik agenttikterge eńbek ujymyndaǵy epidemiiaǵa qarsy rejim algoritmderin saqtai otyryp, jumys isteýine ruqsat berilgen. Sondai-aq jekelegen óńirlerde qonaqúi qyzmetin kórsete berýge bolady.
«1 maýsymǵa qarai shipajailar, demalys úileri men týristik bazalar syndy týrizm nysandardyń jumys algoritmi bekitiletini kózdelgen. Olardyń jumys erekshelikterine bailanysty airyqsha sharttar qarastyrylady. Bul - basseinder, jaǵajailar, oiyn-saýyq aimaqtary jumystaryna arnalǵan talaptar», - dedi Dastan Rysbekov.
