Túrkistan oblysy, Túlkibas aýdanynda jazýshy, abaitanýshy ǵalym Mekemtas Myrzahmetulynyń shyǵarmashylyq úii ashyldy, dep habarlaidy "Ult aqparat".
Toqsan jastan asqan jazýshyǵa jerlesteri týǵan jeri Maitóbe aýylynan shyǵarmashylyq úi turǵyzyp, tartý etti. Bul úi aýdan ákimi Nurbol Turashbekovtyń tikelei bastamasymen demeýshiler esebinen boi kóterdi. Bes bólmeden turatyn shyǵarmashylyq úii zaman talabyna sai jabdyqtalyp, aýmaǵy abattandyrylǵan.
Saltanatty jiynda aýdan basshysy ǵylym salasyna ólsheýsiz úles qosqan Mekemtas Myrzahmetulyna sheksiz rizashylyǵyn bildirip, úidiń kiltin tabys etti.
«Eshkim de Eńbek Eri bolyp týmaidy. Abyroi da, qurmet te eńbekpen keledi. Árkim – óz dáýiriniń perzenti. Óz zamanynyń talabyna ózinshe ún qosady, eńbegin arnaidy. Halqynyń baqyty úshin kúndiz-túni tynbai, elge qyzmet etken Mekemtas aǵamyz baqytyn ǵylymnan tapqan azamat. Uly aqyn Abai Qunanbaev pen dańqty qolbasshy Baýyrjan Momyshulynyń bai murasyn tereń zerttegen jazýshy qazaq ǵylymynyń damýyna, ádebietimizdiń órkendeýine eleýli úles qosty. Búginde ǵylymi jáne tarihi eńbekteri elimizdiń damýyna septigin tigizip, tárbielegen shákirtteri respýblikanyń barlyq aimaǵynda jemisti eńbek etýde», - dedi Nurbol Turashbekov.
