Túrkistan oblysynyń Túlkibas aýdanynda halyqaralyq deńgeidegi ádebi basqosý ótti, dep habarlaidy QazAqparat tilshisi.
«Taýpisteli taǵylymy - 2019: Sherhan men Nasyr baýynda» atty jiynǵa ardagerler men ziialy qaýym ókilderi, Qazaqstan, Túrkiia, Ózbekstannyń qalamgerleri men buqaralyq aqparat quraldary ókilderi jáne shyǵarmashyl jastary qatysty.
Árbir úsh jyl saiyn ótetin basqosý túbi bir túrkiler týystyǵy men ádebiet pen jýrnalistika, jas urpaq tárbiesi týraly oi qozǵaý men rýhani bailanysty tereńdetý maqsatynda uiymdastyryldy.
«Rýhani jańǵyrý» baǵdarlamasy aiasynda ótkizilgen biylǵy basqosý qazaq jáne ózbek halqynyń Sherhan Murtaza men Nasyr Fazyl syndy sóz zergerleriniń shyǵarmashylyǵyna arnaldy. «Marhabat-Miras» qoǵamdyq qory men Túlkibas aýdany ákimdigi qolǵa alǵan bastamaǵa Túrkistan oblysy ákimdigi qoldaý kórsetti.
Jiynǵa qatysýshylar aldymen aýdan ortalyǵyndaǵy Turar Rysqulov eskertkishine gúl shoǵyn qoiyp, Túrkibasy áýlie kesenesine aialdady. Odan soń Taýpistelidegi Sherhan men Nasyr baýyna jinaldy. Jiynǵa Túrkistan oblysy ákiminiń orynbasary ári ádebiet salasynyń ókili Málik Otarbaev jiynǵa arnaiy qatysyp, oblys ákimi Ómirzaq Shókeevtiń quttyqtaý hatyn tapsyrdy. Ádebiet pen rýhaniiat salasyna qoldaý kórsetiletinin, mundai basqosýlardyń jas urpaq úshin bereri mol ekenin jetkizdi.
Sondai-aq, aýdan ákimi Nurbol Turashbekov tabiǵaty sóz soilep, tamyljyǵan Túlkibasqa ádebietshilerge rizashylyǵyn bildirdi. Taǵylymdy kezdesýde Qazaqstan Jazýshylar odaǵy basqarmasynyń hatshysy, Memlekettik syilyqtyń laýreaty Esenǵali Raýshanov pen Ózbekstan Jazýshylar odaǵy qazaq ádebieti keńesiniń hatshysy, jazýshy, aýdarmashy Mehmanqul Islamqulov, Qazaqstannyń Qurmetti jýrnalisi Baidýlla Qonysbek pen Túrkiia Respýblikasynyń ókili, belgili ǵalym Q.Iasaýi atyndaǵy HQTÝ-dyń túrik filologiiasy kafedrasynyń meńgerýshisi Asyl Shengún baiandama jasady.
Halyqaralyq «Alash» syilyǵynyń laýreaty, K.Simonov medaliniń iegeri Narmahan Begalyuly men Nesipbek Dáýitaiuly jáne ózge de aqyn-jazýshylar qos qalamger jaily tolǵanystaryn, qoǵam, ádebiet, rýhaniiat týraly keleli oilaryn aityp ótti.
Ádebiet, jýrnalistika jaily usynystaryn, jas talanttar týraly oi-pikirlerin bildirdi. Áserli júzdesýde qalamgerler ádebietke qadam basqan jastarǵa bata berip, aq jol tiledi. Basqosý barysynda Sherhan Murtaza men Nasyr Fazyldyń shyǵarmalarynan úzindiler usynylyp, jiyn sońy kontserttik baǵdarlamamen jalǵasty. Basqosý sońynda qalamgerler Boztorǵai asýyna saiahat jasady.
