Ulttyq statistika biýrosynyń basshysy Nurbolat Aidapkelov sanaq suraqtaryna bala týý jáne shetinegen náreste týraly saýaldyń ne úshin engizilgenin túsindirdi, dep habarlaidy QazAqparat.
«Bala týý týraly suraqqa jaýap alý náreste jáne bala ólimi týraly jan-jaqty tolyq málimet jinaqtaýǵa múmkindik beredi. Tiri týǵan balalardyń sany týraly suraq, bala týý týraly mańyzdy derekterdi qamtamasyz etedi. Olardy kei jaǵdaida qandai da bir basqa kózderden, onyń ishinde azamattyq hal aktilerin tirkeýdiń tolyq damyǵan júiesiniń ózinen alý múmkin emes. Bul suraqqa berilgen jaýaptar bala týý týraly neǵurlym tolyq aqparatty ashady. Iaǵni, sanaqtan ótý sátindegi kózi tiri balalar týraly suraq, náreste men bala ólimi týraly mańyzdy aqparat beredi» - dedi biýro basyshsy ortalyq kommýnikatsiialar qyzmetinde ótken brifingide.
Eske salsaq, jalpulttyq sanaqtyń onlain kezeńine qatysqan qazaqstandyqtar arasynda «Neshe bala dúniege ákeldińiz, onyń ishinde tirisi» degen suraq qyzý talqylanǵan bolatyn.
«Áielderge 1999 jáne 2009 jylǵy halyq sanaqtarynda da balalarynyń sany, onyń ishinde tiri týylǵandary jáne olardyń qanshasy tiri degen suraqtar qoiylǵan bolatyn. Bul suraqtarǵa jaýaptar bala týýdy baǵalaýdy esepteý jáne úlken jastaǵylardyń bala týǵyzý men bala týý qabiletiniń taýsylý deńgeiin baǵalaý boiynsha da mańyzdy aqparat beredi. Bul nátijeler bala týýdaǵy ózgeris tendentsiiasyn baǵalaýǵa negiz bolady. Halyq sanaǵynyń nátijesi boiynsha týylǵan balalardyń jynysy boiynsha sany, týylǵan kezdegi jynystardyń arasalmaǵy, kogorttyq bala týý, týý kúntizbesi týraly derekter alynady», - dedi Nurbolat Aidapkelov.
