QR Densaýlyq saqtaý ministri Aleksei Tsoi otandyq QazVac vaktsinasyna qatysty pikir bildirdi, dep habarlaidy "Ult aqparat".
«Jalpy, otandyq vaktsinany ázirleý – bul Qazaqstannyń úlken jetistigi. Osyǵan orai qysqa ǵana ýaqyttyń ishinde vaktsinany ázirlegen áriptesterimizge taǵy da bir márte rizashylyǵymyzdy bildirgim keledi jáne ol búginde qazaqstandyqtar úshin qoljetimdi bolyp otyr. Ózderińizde bilesizder, vaktsinanyń tájiribelik toptamasy shaǵyn kólemde Gvardeiskii eldi mekeninde ornalasqan QR Bilim jáne ǵylym ministrliginine qarasty Biologiialyq qaýipsizdik máseleleri jónindegi ǵylymi-zertteý institýtynyń alańynda shyǵarylyp jatyr», - dedi Aleksei Tsoi Ortalyq kommýnikatsiialar alańynda ótken baspasóz máslihaty barysynda.
Sonymen qatar ol otandyq vaktsinany alǵandyǵyn basa aitty.
«Túptep kelgende vaktsinanyń sapaly ekendigin jáne qandai da bir janama áseriniń joqtyǵyn kórip otyrmyz», - dedi Densaýlyq saqtaý ministri.
