QR Densaýlyq saqtaý ministri Aleksei Tsoi aldaǵy eki aidaǵy KVI syrqattaný kórsetkishine boljam jasady, dep habarlaidy "Ult aqparat".
«Dúniejúzilik densaýlyq saqtaý uiymynyń málimeti boiynsha, sońǵy tórt aptada DDSU-nyń alty aimaǵynyń beseýinde infektsiia 80%-ǵa nemese eki ese artqan. Bul ósýdiń basym bóligi qazirgi ýaqytta 132 elde tabylǵan asa juqpaly delta nusqasynan týyndaidy. Delta shtamynyń alǵash ret elordada anyqtalǵanyn jáne syrqattanýdyń kúrt ósýine ákelgenin eskere otyryp, Nur-Sultan qalasyndaǵy syrqattaný dinamikasyn zerttedik jáne sońǵy eki aptada aýrý kórsetkishi bir deńgeiden aspaǵanyn baiqadyq», - dedi ministr Úkimettiń búgingi otyrysynda.
Onyń sózine sensek, sońǵy aptada jedel járdem shaqyrý kólemi 11% azaiǵan.
«Tamyz-qyrkúiek ailaryna jasalǵan epidemiologiialyq boljamǵa súiensek, Qazaqstan optimistik stsenariimen kele jatyr. Munda boljam boiynsha tamyz-qyrkúiek ailarynda shamamen 250 myń naýqas tirkeledi. Kúnine ortasha eseppen 7 myń adam. Optimistik stsenariidi odan ári uzartý karantin sharalaryn saqtap, tiisti turǵyndardy vaktsinamen qamtýdy arttyrý kezinde ǵana múmkin bolady», - dep tolyqtyrdy ministr.
Qazir Qazaqstanda Túrkistannan basqa qalalar men oblystardyń barlyǵy "qyzyl aimaqta" tur. Virýs órshidi delingen "qanyq qyzyl" aimaqta Almaty, Shymkent qalalary, Qaraǵandy jáne Atyraý oblystary tur. Ministrdiń aitýynsha, Nur-Sultanda epidemiologiialyq ahýal turaqtanǵan.
Sondai-aq, qazir Qazaqstanda infektsiialyq aýrýhanalardaǵy oryndardyń - 56 paiyzy, reanimatsiia tósekteriniń 44 paiyzy bos emes. Ásirese, Nur-Sultan, Shymkent qalalarynda, Atyraý, Aqmola, Mańǵystaý oblystarynda statsionarlar tez tolyp barady.
Sonymen birge, elimizde vaktsina salynýy tiis halyqtyń 55 paiyzy ekpe alǵan.
«Halyqty koronavirýs infektsiiasyna qarsy vaktsinalaý jumystary jalǵasýda. Qazirgi ýaqytta 9,4 mln doza vaktsina qoldanylǵan. Onyń birinshi komponentin 5 480 094 adam salǵyzdy, bul vaktsina alýy tiis halyqtyń 55,4 paiyzyn quraidy. Ekinshi komponentimen 3 941 941 adam nemese tiisti halyqtyń 39,8 paiyzy qamtyldy», - dedi ministr Úkimettiń búgingi otyrysynda.
Ministrlik taǵy 4 mln halyq úshin qosymsha 8 mln doza jetkizýge kelisimder ornatty. Jetkizý jumystary kestege sáikes júrgiziledi.
«Osyǵan bailanysty respýblikada vaktsinalaýǵa qoljetimdilik jetkilikti kólemde qamtamasyz etilgen», - deidi Tsoi.
