QR Parlamenti Senatynyń depýtaty, Áleýmettik-mádeni damý jáne ǵylym komitetiniń tóraǵasy Murat Baqtiiaruly eldegi tótenshe jaǵdaiǵa qatysty pikir bildirdi, dep habarlaidy "Ult aqparat".
«Álemge taralǵan bul indet kóptegen elderdi tyǵyryqqa tiredi. Onyń ishinde bizdiń eldi de ainalyp ótken joq. Osyǵan bailanysty elimizde tótenshe jaǵdai engizilip, Prezident pen Úkimet tarapynan naqty sheshimder qabyldanyp jatyr. Aldymen eki qala Nur-Sultan men Almaty, sodan soń kesheli beri birqatar oblys ortalyqtary da karantinge jabylyp jatyr. Bul – durys sheshim. Sebebi koronavirýs indetinen qutylýdyń birden bir joly ol – úiden shyqpai oqshaýlaný. Osyndai jaǵdaida aldymen meditsina salasy mamandaryna negizgi aýyrtpalyq túsetini aqiqat. Sodan soń politsiia qyzmetkerleri de erekshe ról atqarýda. Osy mamandardyń jumystary kúsheitilgen rejimge aýystyrylyp, olar 24 saǵat boiy tynymsyz eńbek etýde. Sonymen qatar halyqty azyq-túlik jáne basqa kúndelikti qajetti zattarmen qamtamasyz etýshi qyzmetkerlerdiń eńbegin erekshe atap ótip, alǵysymyzdy bildiremiz. Tótenshe jaǵdaida jumys istep jatqan azamattardyń eńbegi eren», - dedi M. Baqtiiaruly.
Ol Senat depýtattary óz kezeginde meditsina mamandarynyń jalaqysyn ósirip, olarǵa qosymsha eńbekaqy tóleý usynysyn qoldaitynyn aityp ótti.
«Biraz elder tótenshe jaǵdaiǵa bailanysty shuǵyl sheshimder qabyldap jatyr. Sonyń ishinde tynymsyz eńbek etip jatqan dárigerlerge jaǵdai jasaý da bar. Prezidentimiz ben Úkimet basshysy elde tótenshe jaǵdai engizilgen kúnnen bastap máseleni nazarda ustaýda. Biz senatorlar óz kezegimizde meditsina salasy mamandarynyń jumysyna qurmetpen qarap, olarǵa kórsetiletin kómekke qatysty usynysty bir aýyzdan qoldaimyz», - dedi ol.
Sonymen qatar depýtat Murat Baqtiiaruly búginde Senat jumysynyń toqtap turmaǵanyn aita kele, jumystyń qashyqtan onlain túrde júrip jatqanyn alǵa tartty.
«Biz osy sońǵy eki apta kóleminde qashyqtan jumys isteý rejimine kóshtik. Zańnamalardy onlain túrde talqyǵa salyp, arnaiy chat arqyly bir-birimizben pikir almasýdamyz. Iaǵni Senattyń jumysy toqtap turǵan joq. Aitar bolsaq, aldaǵy sáýir aiynyń 9-y men 30-y aralyǵynda birneshe zańnama qabyldanatyn bolady. Ol zańdar qarjy, ishki kóshi-qon jáne eńbek salalaryna qatysty. Atalǵan salalarǵa qatysty ministrliktiń mamandary qajet bolǵan jaǵdaida biz tek bir mamandy nemese ázirleýshini shaqyryp, sol kisi arqyly barlyq suraqtarǵa jaýap alamyz nemese usynysymyzdy bildiremiz. Odan da basqa Tóraǵanyń tikelei tapsyrmalaryn onlain túrde alyp, onlain túrde jaýap berýdemiz», - dedi senator.
