Tótenshe jaǵdai kezinde 5,6 millionnan astam adam memleket tarapynan áleýmettik kómek aldy. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Qysqa merzimde, birneshe kúnniń ishinde, Memlekettik áleýmettik saqtandyrý qorynan tótenshe jaǵdaidyń engizilýine bailanysty tabysyn joǵaltqan adamdarǵa eń tómengi jalaqy mólsherinde múldem jańa tólem - 42 500 teńge engizildi. Bul tólem buǵan deiin jumys istep kelip, májbúrli túrde jumyssyz qalǵan azamattarǵa arnalǵan. Áleýmettik tólemge 8 million azamat ótinish berip, kriteriilerge sáikes keletin 4,6 million adamǵa barlyǵy 321,9 mlrd teńgege kómek taǵaiyndaldy», - dedi ministr Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda.
Onyń aitýynsha, TJ rejimin engizý áleýmettik-eńbek salasyndaǵy memlekettik qyzmet kórsetý sapasyna keri áser etpeýi úshin 24 qyzmet jedel túrde egov.kz portalyndaǵy «Elektrondyq ótinishter» servisine ornalastyryldy. Memlekettik áleýmettik saqtandyrý qorynan jumysynan aiyrylý saldarynan tólem jasaý protsesin jedeldetý maqsatynda jumyssyz mártebesin berý merzimi 14-ten kúnnen 3 jumys kúnine deiin qysqardy.
«TJ kezinde 108,9 myń otbasyna ataýly áleýmettik kómek avtomatty túrde taǵaiyndaldy. Sondai-aq, osy kezeńde múgedektik jáne múgedektik boiynsha tólemder avtomatty túrde 3 aiǵa uzartyldy», - dedi Birjan Nurymbetov.
Sonymen qatar ministr muqtaj azamattarǵa arnalǵan azyq-túlik jiyntyǵynyń eń tómengi quramy bekitilip, ony berýdiń arnaiy tártibi jasalǵanyn aitty. Birjan Nurymbetovtiń dereginshe, tótenshe jaǵdai kezinde 1 million 45 myń azamat, onyń ishinde AÁK alýshylar qatarynan 6 jastan 18 jasqa deiingi 202,7 myń bala; 109,6 myń tirkelgen jumyssyz; 648 myń múgedek bala, I, II jáne III toptaǵy múgedekter; múgedek balany tárbielep otyrǵan 84,9 myń adam azyq-túlik jiyntyǵymen qamtamasyz etildi.
