Kúdiktiniń kúieýi sot aldynda © 1tv.kz
Atyraýda tórt ailyq balasyn pyshaqtap óltirgen áielge qatysty sot bastaldy. Sot saraptamalyq zertteý nátijesinde qatygez kelinshek sábiin 38 jerden pyshaqtaǵany anyqtaldy, - dep habarlaidy Tengrinews.kz portaly KTK telearnasyna silteme jasap.
Telearna málimetinshe, oqiǵa sáýirde Kóptoǵai aýylynda bolǵan. Áiel adam tórt ailyq sábiin úiinde pyshaqtap óltirgen. Ol joldasy aýdan ortalyǵyna ketkende osyndai qylmysqa barypty.
Kúdiktiniń kúieýiniń sózinshe, áieli bosanǵannan keiin psihikalyq aýytqý baiqala bastaǵan. Tipti sábii jylaǵan kezde kózine eles kórinetinin jii aitqan. Áielin emshige kórsetkenimen, dertine daýa tappapty.
"Náresteniń ólimi júrek qabyǵyn jaraqattaýymen, oń jaq qabyqshasyn jaryp ótken. Keýdesin tesip ótken. Ólim - túirep tesilgen jaraqat saldarynan, júrektiń qansyraýynan bolǵany anyqtaldy", - deidi prokýror Nurbolat Ábilov.
Bes ai boiy tergelgen kúdikti sot otyrysyna qatysa almaǵan. Sebebi 42 jastaǵy áiel psihologiialyq dispanserde qatań baqylaýda jatyr. Ondaǵy mamandar áieldiń diagnozyn sot otyrysy aiaqtalǵansha aitýy tiis. Dárigerler osy kúnge deiin naýqastyń balasyn izdep nemese ótken iske ókingen áreketin baiqamaǵan. Dárigerlerdiń sózinshe, jaǵdaiy ázirge turaqty.
"Qazir ol áiel sot sheshimimen 20 tamyzdan beri bizde emdelip jatyr. Onyń diagnozy ázirge dárigerlik qupiia bolyp sanalǵandyqtan, aita almaimyn. Biraq júike-júiesinde aýytqý bary jasyryn emes. Sot sheshimi shyqsa, naýqas áieldi Almatyǵa emge jiberýimiz múmkin. Ázirge baqylaýda ustap otyrmyz", - deidi Atyraý oblysy psihikalyq densaýlyq ortalyǵy direktorynyń orynbasary Damir Qojamtaev.
