Qazaq taǵamtaný akademiiasynyń prezidenti, meditsina ǵylymdarynyń doktory Tóregeldi Sharmanov qazirgi jaǵdaida dári-dármek qymbatqa nemese zańsyz satyp paidaǵa kenelgisi kelip júrgenderdi jazalaýǵa qatysty pikir bildirdi, dep habarlaidy QazAqparat.
«Moraldyq turǵydan alǵanda bul adam jiirkenetin jaǵdai. Mundai qylyq bizdiń halyqqa múlde jat kórinis bolatyn. Osyndai jaǵdaidy jasap otyrǵan adamdarda júrek joq. Midaǵy bilimdi júrekke túsir deidi. Bul – qaltasyn oilaǵan qatigez adamdar. Mundai oqiǵalardy joiyp, alastatý kerek. Bul adamdardy aiaýǵa bolmaidy. Adamzat qyrylyp jatsa, dárilerdi tyǵyp, qymbatqa satýǵa tyryssań – adamdyǵyń qaida qaldy?» - deidi Tóregeldi Sharmanov «Antikor Live» jobasynda bergen suhbatynda.
Qazaq taǵamtaný akademiiasynyń prezidenti mundai adamdardy halyq aldynda sottaý kerek degen pikir bildirdi.
«Ókinishti-aq biraq qazaqtyń mentalitetine jat qylyqtardyń kýási bolyp otyrmyz. Olar – adam degen uǵymnan jat. «Qasqyr da qas qylmaidy» joldasyna deimiz. Al bizde óz basyn oilap, otandastarynyń ahýalymen múlde sanaspaityndar kezdesti», - dedi ol.
