Memleket basshysy Qasym-Jomart Toqaev Joǵary aýditorlyq palata tóraǵasy Álihan Smaiylovty qabyldap, 2026 jyldyń alǵashqy jartyjyldyǵynda júrgizilgen memlekettik aýdittiń nátijelerimen tanysty, dep habarlaidy ult.kz.
Álihan Smaiylovtyń aitýynsha, osy kezeńde jalpy somasy 5,8 trillion teńgeni qamtityn 13 iri memlekettik aýdit ótkizilgen. Tekserýler jergilikti atqarýshy organdardy, «Problemalyq kreditter qory», «Agrarlyq korporatsiia», «Qazposhta», «Aqtaý teńiz porty» aktsionerlik qoǵamdaryn, densaýlyq saqtaý nysandary men birqatar memlekettik organdardy qamtyǵan.
Anyqtalǵan zańbuzýshylyqtar men kemshilikterdi joiý nátijesinde memlekettik biýdjetke 128 milliard teńge qaitarylǵan. Sonymen qatar Úkimet pen aýdit júrgizilgen uiymdarǵa 35 usynym jáne 413 nusqama joldanǵan.
Kezdesýde biýdjet protsesin jetildirý maqsatynda qabyldanǵan ózgerister de sóz boldy. Atap aitqanda, makroekonomikalyq boljam jasaýdyń jańa tártibi engizilip, biýdjet qarajatyn paidalanýǵa baqylaý kúsheitilgen jáne jyldyń tórtinshi toqsanynda biýdjetke túzetý engizýge tyiym salynǵan.
Sondai-aq biylǵy ekinshi jartyjyldyqta 20 memlekettik aýditti aiaqtaý josparlanyp otyr. Onyń ishinde Memleket basshysynyń tapsyrmasymen Shymkent qalasy, Qaraǵandy jáne Shyǵys Qazaqstan oblystary, sondai-aq farmatsevtikalyq ónim óndirýshilerdi qoldaý tetikteri tekseriledi. Budan bólek, gaz salasy, investitsiialyq jobalar, «Jasyl damý» AQ, «QazAvtoJol» UK» AQ, ulttyq jobalar jáne «Aýyl – el besigi» baǵdarlamasyna da aýdit júrgiziledi.
Kezdesý sońynda Prezident memlekettik aýdit júiesin odan ári jetildirý úshin tsifrlyq sheshimder men jasandy intellekt tehnologiialaryn keńinen engizýdi tapsyrdy.
