Prezident Qasym-Jomart Toqaev Shanhai yntymaqtastyq uiymyna múshe memleketter basshylary keńesiniń otyrysyna qatysyp, Uiym aiasyndaǵy yntymaqtastyqty damytýǵa qatysty birqatar usynys aitty, dep habarlaidy ult.kz.
Memleket basshysy jiyndy joǵary deńgeide uiymdastyrǵany úshin Qyrǵyzstan Prezidenti Sadyr Japarovqa jáne qyrǵyz halqyna alǵys bildirdi. Sondai-aq Qyrǵyzstan men Ózbekstannyń táýelsizdiginiń 35 jyldyǵymen quttyqtady.
Toqaevtyń aitýynsha, shirek ǵasyr ishinde ShYU «Shanhai bestiginen» Eýraziianyń basym bóligin qamtityn, álem halqynyń jartysyna jýyǵyn biriktiretin iri halyqaralyq uiymǵa ainaldy.
Prezident qazirgi geosaiasi jaǵdaida Uiymnyń mańyzy arta túskenin atap ótti.
«ShYU áskeri-saiasi blok logikasynan tys áreket etedi ári onyń qyzmeti qandai da bir memleketke qarsy baǵyttalmaǵan. Uiym múldem basqa saiasi filosofiiaǵa, iaǵni túpki ózeginde progress jolyndaǵy ortaq bastamalar ideiasy jatqan “Shanhai rýhyna” súienedi», – dedi Qasym-Jomart Toqaev.
Qazaqstan qandai usynystar jasady?
Memleket basshysy ShYU aiasyndaǵy negizgi basymdyqtarǵa toqtalyp, birqatar bastama usyndy.
Qaýipsizdik salasynda Eýraziiadaǵy strategiialyq turaqtylyq pen senim sharalaryna arnalǵan ministrler deńgeiindegi ShYU konferentsiiasyn ótkizýdi usyndy. Onda áskeri táýekelderdi azaitý, qarýlaný jarysyn tejeý jáne qaýipti oqiǵalardyń aldyn alý máseleleri talqylanýy múmkin.
Ekonomika salasynda ShYU elderiniń ózara saýda ainalymy bir trillion dollarǵa jaqyndaǵanyn atap ótti. Prezident saýda-investitsiialyq keńistikti keńeitip, indýstriialyq konsortsiýmdar tetigin engizýdi usyndy.
Sonymen qatar qazirgi shekara mańyndaǵy yntymaqtastyq ortalyqtarynyń bazasynda ShYU transshekaralyq saýda aimaqtaryn qurýdy usyndy.
Toqaev ShYU Damý bankin qurý týraly Qytai bastamasyn qoldaitynyn málimdedi. Onyń aitýynsha, bul qarjy institýtynyń qarajatyn infraqurylymdyq, tehnologiialyq jáne ónerkásiptik jobalarǵa baǵyttaý qajet. Qazaqstan bank shtab-páterin óz aýmaǵynda ornalastyrýǵa daiyn ekenin bildirdi.
Kólik-logistika salasynda Qazaqstan «Bir beldeý, bir jol» jobasyn Transkaspii halyqaralyq kólik baǵdary jáne Soltústik–Ońtústik dálizimen bailanystyrýǵa mán beretinin aitty. Sondai-aq ShYU-nyń Biryńǵai tranzit tsifrlyq platformasyn qurýdy jáne 2035 jylǵa deiingi Kólik bailanysy strategiiasyn ázirleýdi usyndy.
Jasandy intellekt salasynda ShYU aiasynda Jasandy intellekt ortalyqtarynyń jelisin qurý bastamasy kóterildi. Oǵan uiymǵa múshe elderdiń jetekshi ýniversitetteri, ǵylymi mekemeleri men tehnologiialyq kompaniialary qatysýy múmkin.
Sóz sońynda Prezident ShYU-ny reformalaý máselesi áli de ózekti ekenin aityp, bul baǵyttaǵy jumysty syrtqy saiasat vedomstvolaryna júkteýdi usyndy.
«Qazaqstan ShYU aiasyndaǵy san qyrly yntymaqtastyqty jańa ári sapaly deńgeige kóterýge barynsha kúsh salýǵa daiyn», – dedi Qasym-Jomart Toqaev.
