Memleket basshysy Qasym-Jomart Toqaev birinshi shaqyrylymdaǵy Quryltaidyń alǵashqy sessiiasynyń ashylýyna qatysty. Prezident bul kúndi Qazaqstannyń damý jolyndaǵy tarihi kezeń dep atady, dep habarlaidy ult.kz.
Toqaevtyń aitýynsha, jalpyulttyq referendýmda halyq qoldaǵan jańa Konstitýtsiiaǵa sáikes, elimizdiń bir palataly zań shyǵarýshy organy — Quryltai resmi túrde jumysyn bastady.
«Biz ult jylnamasynyń jańa paraǵyn ashyp otyrmyz. Bul – memleketimizdiń saiasi júiesiniń jańarý úderisi dál osy kúnnen bastaý alady degen sóz», — dedi Prezident.
Memleket basshysy Quryltaidyń bilik júiesin jańǵyrtyp, memlekettik apparattyń jumysyna jańa serpin beretinin atap ótti. Sondai-aq onyń ulttyq zańnamanyń sapasyn arttyrý arqyly eldiń quqyqtyq negizin nyǵaitýǵa yqpal etetinin aitty.
Quryltai sailaýyna azamattardyń 74 paiyzdan astamy qatysty
Prezidenttiń sózinshe, Quryltai sailaýyna azamattardyń 74 paiyzdan astamy qatysyp, daýys bergen.
Sailaýǵa sheteldik baqylaýshylardyń da qyzyǵýshylyǵy joǵary bolǵan. Qazaqstanǵa halyqaralyq uiymdar men shet memleketterden 800-ge jýyq baiqaýshy kelgen. Toqaev bul kórsetkishti ulttyq parlamentarizm tarihyndaǵy eń joǵary nátije dep atady.
Prezident sailaýdyń ashyq ári ádil ótkenin aityp, qoǵamnyń saiasatqa jáne qoǵamdyq jumystarǵa qyzyǵýshylyǵy artqanyn atap ótti.
«Qazirgi zaman qur ýádeniń, jalǵan sóz ben jalań urannyń ýaqyty emes. Bizdiń qoǵam kemeldene bastady», — dedi Qasym-Jomart Toqaev.
«Ádilet» partiiasy Quryltaida konstitýtsiialyq kópshilikke ie boldy
Memleket basshysy Quryltai sailaýy Qazaqstandaǵy saiasi alýandyqtyń jańa deńgeige kóterilgenin kórsetkenin aitty.
Onyń sózinshe, sailaýǵa qatysqan partiialar óz baǵdarlamalaryn halyqqa tanystyryp, arasynda ashyq báseke bolǵan.
Sailaý qorytyndysy boiynsha «Ádilet» partiiasy basym daýyspen jeńiske jetip, Quryltaida konstitýtsiialyq kópshilikke ie boldy.
«Sondyqtan «Ádilet» partiiasyna qoiylatyn talap ta, artylatyn úmit te, senim de asa joǵary. Osy oraida qoǵamdy ortaq múddege uiystyryp, reformalardyń qozǵaýshy kúshi bolý óte mańyzdy», — dedi Prezident.
Toqaev partiialar sailaýshylarmen jumysty jalǵastyryp, óz baǵdarlamalaryndaǵy tiimdi usynystardy júzege asyrýǵa atsalysýy kerektigin aitty.
Prezident depýtattarǵa úndeý jasady
Qasym-Jomart Toqaev Quryltaidyń alǵashqy quramyna erekshe jaýapkershilik júkteletinin atap ótti.
«Depýtattar halyqtyń amanatyna adal bolyp, memleket múddesine qyzmet etýi kerek. Bul – anyq aqiqat. Muny eshqashan esten shyǵarmaý qajet», — dedi Memleket basshysy.
Prezident jańa Konstitýtsiianyń qabyldanýyn Qazaqstan tarihyndaǵy mańyzdy betburys dep baǵalady. Onyń aitýynsha, konstitýtsiialyq reforma nátijesinde jańa saiasi-quqyqtyq júieniń negizi qalanyp, azamattardyń el basqarý isine qatysýyna naqty múmkindik berildi.
