Prezident Qasym-Jomart Toqaev Qazaqstannyń 2020–2030 jyldarǵa arnalǵan syrtqy saiasat tujyrymdamasyna ózgerister engizdi. Tiisti jarlyqqa 14 tamyzda qol qoiylǵan, dep habarlaidy ult.kz.
Jańartylǵan qujatta Qazaqstannyń syrtqy saiasatynyń negizgi baǵyty retinde kópvektorly, pragmatikalyq jáne proaktivti saiasat ustanymy saqtalǵan. Sonymen qatar ulttyq múddeni qorǵaýǵa basymdyq kúsheitildi.
Tujyrymdamada Qazaqstannyń táýelsizdigi, egemendigi men aýmaqtyq tutastyǵyn nyǵaitý, syrtqy saiasattaǵy derbestikti saqtaý negizgi mindetterdiń biri retinde kórsetilgen.
Taǵy bir mańyzdy ózgeris — memleket azamattarynyń sheteldegi múddesin qorǵaýǵa erekshe nazar aýdarylýy. Qazaqstan shetelde júrgen azamattarynyń quqyqtary men zańdy múddelerin qorǵaý jumystaryn jetildirýdi kózdeidi. Bul shetel azamattary asyrap alǵan, shetelde turatyn qazaqstandyq balalarǵa da qatysty.
Qujatta syrtqy saiasatty qoǵamǵa túsindirý qajettigi de kúsheitildi. Qazaqstan biligi azamattarǵa syrtqy saiasattyń mindetteri, basymdyqtary jáne onyń el azamattaryna ákeletin naqty nátijeleri men paidasyn júieli túrde túsindirýi tiis.
Sondai-aq halyqaralyq qoǵamdastyqqa Qazaqstannyń aimaqtyq jáne jahandyq saiasat pen ekonomikaǵa qatysty ustanymdary men bastamalaryn, sonyń ishinde Astana halyqaralyq forýmynyń múmkindikterin paidalana otyryp, tanystyrý kózdelgen.
Qujattaǵy taǵy bir nazar aýdararlyq ózgeris — memlekettik qurylymǵa qatysty bólim. Jańartylǵan tujyrymdamada:
«Qazaqstan Respýblikasynyń Quryltaiy — zań shyǵarýshy bilikti júzege asyratyn Qazaqstan Respýblikasynyń joǵary ókildi organy» dep kórsetilgen.
Sonymen birge syrtqy saiasattaǵy sabaqtastyq qaǵidaty saqtalyp, Qazaqstannyń halyqaralyq bedelin nyǵaitý men álemdik saiasi, ekonomikalyq jáne gýmanitarlyq keńistikke teń dárejede integratsiialaný mindetteri belgilendi.
Jarlyq kúshine endi.
