Qazaqstanda halyqtyń ortasha ómir súrý uzaqtyǵy 76 jasqa jetti. Bul týraly Prezident Qasym-Jomart Toqaev Parlament palatalarynyń birlesken otyrysynda málimdedi, dep habarlaidy ult.kz.
Memleket basshysynyń aitýynsha, bul kórsetkish boiynsha Qazaqstan óńirdegi kóshbasshy elge ainaldy.
«Azamattardyń ortasha ómir súrý uzaqtyǵy búginde shamamen 76 jasqa jetti. Dúniejúzilik banktiń derekterine sáikes, Qazaqstan bul kórsetkish boiynsha óńirde kósh bastap tur. Bul – elimizdiń damý deńgeiin aiqyndaityn mańyzdy kórsetkishterdiń biri», – dedi Qasym-Jomart Toqaev.
Prezidenttiń aitýynsha, sońǵy jyldary elimizdiń densaýlyq saqtaý júiesi qarqyndy damyp keledi. 2019 jyldan beri Qazaqstanda 1300-ge jýyq meditsinalyq nysan salynǵan.
Sonymen qatar barlyq azamattarǵa saqtandyrý mártebesine qaramastan bazalyq meditsinalyq kómek kórsetiledi. Sondai-aq neirohirýrgiiadan bastap reprodýktivti meditsinaǵa deiingi joǵary tehnologiialyq meditsinalyq qyzmetter qoljetimdi.
«Sonymen qatar biz qoǵamǵa qyzmet etýdi ómirlik muratyna ainaldyrǵan azamattar úshin laiyqty eńbek jaǵdaiyn jasap kelemiz. Muǵalim men dáriger mamandyǵynyń bedelin naqty ister arqyly kóterip jatyrmyz. Pedagogterdiń, meditsina jáne áleýmettik sala qyzmetkerleriniń jalaqysy kezeń-kezeńimen ósip keledi. Sońǵy úsh jylda 1 million 200 myńnan astam adamnyń eńbekaqysy 50 paiyzdan 100 paiyzǵa deiin ulǵaityldy», – dedi Memleket basshysy.
