Túrkistan oblysynda tólebilik kásipker taý bókterine qulpynai egýdi qolǵa aldy. Alǵabas eldi mekeniniń turǵyny Qanat Jienbaev bos jatqan jerge jemistiń osy túrin egip, mol tabysqa kenelip otyr, dep habarlaidy "Ult aqparat".
Jeke kásipker 2015 jyldan beri bos jatqan 70 sottyq jeriniń 50 sottyǵyna tamshylatyp sýǵarý ádisin paidalanyp, qulpynai kóshetterin otyrǵyzǵan. Atalǵan sharýashylyqta qajettilikke qarai 4 adamnan 12 adamǵa deiin jergilikti turǵyndardy jumyspen qamtyp, kúnine árqaisysyna 2200 teńgeden tóleýde.
Qanat Jienbaevtyń sózinshe, maýsymyna 1 tonna kóleminde qulpynai alady. Ónimderin mamyr, shilde jáne qyrkúiek ailarynda jinap, saýdalap júr. Diqan aldaǵy ýaqytta eshbir dárilik qospasyz ónim alýdy josparlap otyr.
«Óz ónimderimdi bazarǵa shyǵaryp áýre bolmai-aq, ózimizdiń Birinshi Mamyr, Zaǵambar, Yntymaq aýyldaryna 600 teńgeden satyp otyrmyn. «Jumys joq, aqsha joq» dep júrgen azamattardy osynda kelip, eńbektenýge shaqyrar edim. Sóitip aýlasyndaǵy bos jatqan jerdi igiligine jaratyp jatsa, tabysy da turaqty bolar edi»,- deidi kásipker.
