Qazaqstan Prezidenti Qasym-Jomart Toqaevtyń Instagram-daǵy jazylýshylarynyń sany millionnan asty. Bul týraly óziniń Facebook-tegi paraqshasynda Memleket basshysynyń baspasóz hatshysy Berik Ýáli jazdy, dep habarlaidy "Ult aqparat".
«Qasym-Jomart Toqaevtyń negizgi saiasi ustanymdarynyń biri – ashyqtyq jáne qoǵammen tyǵyz qarym-qatynas ornatý. Prezident «halyq únine qulaq asatyn memleket» kontseptsiiasyn iske asyrý barysynda halyqpen tikelei bailanysqa erekshe kóńil bóledi. Turǵyndardyń ótinish-tilekterin der kezinde qaraý úshin Qazaqstan Prezidentiniń Virtýaldy qabyldaýy ashyldy. Búginde oǵan 6673 ótinish kelip túsken», - dep jazdy Berik Ýáli.
Onyń jazýynsha, Qasym-Jomart Toqaev brifingter men baspasóz máslihattaryn jii ótkizip, otandyq jáne sheteldik BAQ-qa suhbat berip turady. Sonymen qatar Twitter jáne Instagram sekildi áleýmettik jelilerdi belsendi qoldanady.
2019 jyldyń 1 sáýirinde ashylǵan Memleket basshysynyń Instagram jelisindegi paraqshasyna jazylýshylar sany 1 millionnan asty. Prezident 9 ai ishinde óz paraqshasynda resmi sharalardan, kezdesýler men saparlardan 60 post jariialady. Qasym-Jomart Kemeluly aldaǵy ýaqytta Instagram jelisinde beiresmi sátterde túsirilgen sýretter men beinerolikter jariialaýdy da josparlap otyr.
