Búgin Qazaqstan Respýblikasynyń Prezidenti Qasym-Jomart Toqaev Túrkistan oblysynyń atqarýshy organ basshylarymen, ardagerler jáne ziialy qaýym ókilderimen kezdesti, dep habarlaidy "Ult aqparat" jergilikti ákimdiktiń baspasóz qyzmetine silteme jasap.
Jiynda Memleket basshysy óńirdi órkendetý, onyń ortalyǵy - Túrkistan qalasyn damytý máselesi boiynsha oi qozǵap, aldaǵy josparlarymen bólisti.
«Elbasymyzdyń reformalary Qazaqstandy damý jolyna shyǵardy. Biraq álemde básekelestik artýda. Jańadan syn qaterler paida bolýda. Jalpy Dúniejúzinde daǵdarys bolyp, álemniń bolashaǵy bulyńǵyr bolyp bara jatyr. Sondyqtan toqtap qalýǵa múldem bolmaidy. Halyqymyzdyń birligi, ultaralyq kelisim, kúshti ekonmika - alǵa basýdyń negizgi kepili»,- dedi Qasym-Jomart Toqaev.
Memleket basshysy Túrkistan oblysy dotatsiialyq óńir degen attan arylyp, óndiristi damytý, jumys oryndaryn ashý baǵytynda aýqymdy jumystar júrgizilýi kerek ekenin aitty. Túrkistan qalasynyń infraqurylymyn damytý, aýyz sý, gaz jáne sapaly elektr qýatymen, halyqqa qajetti qyzmet kórsetý ortalyqtary men bank bólimshelerin, saýda oryndaryn ashý jóninde tapsyrma berdi. Túrkistandy ǵylym men mádeniettiń rýhaniiattyń ortalyǵyna ainaldyrý boiynsha naqty jospar jasaý jóninde mindet júktedi.
«Búgin halqymyzdyń rýhani astanasy Túrkistan - elimizdiń altyn besigi, mádenietimiz ben rýhaniiatymyzdyń simvoly, búkil halqymyzdyń boitumary. Bul qasietti jerdi kózimizdiń qarashyǵyndai saqtap, damytýymyz kerek. Elbasy Nursultan Nazarbaev «Túrkistan tarihy - barsha qazaqtyń tarihy» dep, bul qalaǵa erekshe mártebe berý týraly sheshimi kezdeisoq emes. Ejelgi Túrkistannyń jańǵyrý jáne jańarýy damý jolymyzdyń durystyǵyn kórsetedi. Prezident retinde saparymdy Túrkistannan bastaý men úshin asa mańyzdy»,- dedi Qasym-Jomart Toqaev.
Memleket basshysy sonymen qatar Túrkistan oblysynyń ákimi Ómirzaq Shókeev Túrkistandy túletýdegi kúrdeli jumysty uiymdastyryp, tabysty júzege asyrady dep senim bildirdi.
