Foto: Aqorda
Memleket basshysy Qasym-Jomart Toqaev Saýda jáne integratsiia ministri Arman Shaqqalievti qabyldap, salanyń qazirgi jaǵdaiy men damý perspektivalaryn talqylady, dep habarlaidy Ult.kz.
Kezdesý barysynda ministr 2025 jyldyń qorytyndysy boiynsha ishki jalpy ónimniń shamamen 19 paiyzy saýda salasyna tiesili ekenin baiandady. Bul baǵytqa 1,2 trillion teńge investitsiia tartylyp, taýar ainalymy 8,9 paiyzǵa ósip, 80,3 trillion teńgege jetken.
Sondai-aq elektrondy saýdanyń damýy týraly aitylyp, onyń kólemi 3,9 trillion teńgeni quraǵany, bul bólshek saýdanyń 15 paiyzyna teń ekeni atap ótildi. Elde 10 logistika ortalyǵy jumys istep tur, al Astana men Almatyda iri fýlfilment-ortalyqtar salynyp jatyr.
Ministrdiń aitýynsha, eksportty damytý baǵytynda da oń dinamika bar. Shikizattyq emes taýarlar men qyzmetterdiń eksporty 41 milliard dollarǵa jetken. Eksporttaýshylardy qoldaý tetikteri keńeitilip, saqtandyrý somasynyń shekti kólemi 1,2 trillion teńgege deiin ulǵaitylǵan.
Budan bólek, Eýraziialyq ekonomikalyq odaq aiasynda 70 saýda kedergisiniń 69-y joiylǵany aityldy. Kelissózder nátijesinde qazaqstandyq kásiporyndarǵa qatysty birqatar jeńildikter qarastyrylǵan.
Kezdesý qorytyndysy boiynsha Prezident vedomstvoǵa zamanaýi saýda ekojúiesin qalyptastyrý, otandyq óndiristi qoldaý, tutynýshylardyń quqyqtaryn qorǵaý jáne eksporttyq áleýetti arttyrý baǵytynda naqty tapsyrmalar júktedi.
