Foto: Aqorda
Qasym-Jomart Toqaev Beibitshilik keńesi aiasynda Prezident Tramp atyndaǵy arnaiy nagrada taǵaiyndaýdy usyndy. Bul týraly Memleket basshysy Keńestiń alǵashqy otyrysynda málimdedi, dep habarlaidy Ult.kz.
Prezidenttiń aitýynsha, Taiaý Shyǵysta ornyqty damýdy qamtamasyz etý úshin beibitshilik pen yntymaqtastyqty, ózara senimdi nyǵaitatyn jańa tásilder qajet.
– Osy ustanymǵa súiene otyryp, Qazaqstan Ibrahim kelisimderine qosylý jóninde sheshim qabyldady. Bul qadam aimaqta jáne odan tys jerlerde pragmatikalyq ekonomikalyq ári gýmanitarlyq yntymaqtastyqty damytýǵa múmkindik beredi jáne Beibitshilik keńesiniń maqsattaryna tolyq sáikes keledi, – dedi Qasym-Jomart Toqaev.
Sondai-aq Prezident Qazaqstan túrli deńgeidegi kezdesýler ótkizý arqyly Keńestiń bastamalaryna naqty qoldaý kórsetýge daiyn ekenin rastady.
– Sonymen qatar Beibitshilik keńesi aiasynda Prezident Tramp atyndaǵy arnaiy nagradany bekitýdi usynamyn. Bul – onyń beibitshilikti ilgeriletý isindegi jetistikterine kórsetilgen qurmet bolmaq. Sizdiń kóregen basshylyǵyńyzben Keńes óziniń tarihi missiiasyn abyroimen atqaratynyna senimdimin, – dedi Memleket basshysy.
Óz kezeginde Donald Tramp Gazadaǵy turaqtylyqty qamtamasyz etý jáne qalpyna keltirý isine atsalysqany úshin Keńestiń alǵashqy otyrysyna qatysýshylarǵa rizashylyǵyn bildirdi.
AQSh Prezidenti Qazaqstandy «keremet ári bai memleket» dep sipattap, sammitke jinalǵan el basshylaryn jahandyq aýqymdaǵy kóshbasshylar retinde atady. Onyń aitýynsha, olar sheshimdi áreketteri arqyly beibitshilik pen turaqtylyqty nyǵaitýǵa jáne halyqaralyq dialogty damytýǵa eleýli úles qosyp keledi.
Joǵary deńgeidegi is-shara barysynda Beibitshilik keńesiniń atqarýshy organdarynyń músheleri baiandama jasady. Qatysýshylarǵa Gaza sektoryn qalpyna keltirý jospary, sonyń ishinde infraqurylymdy damytý, qaýipsizdikti qamtamasyz etý jáne halyqaralyq qarjylandyrý tetikteri tanystyryldy.
Joǵarǵy atqarýshy keńestiń múshesi Djared Kýshner Gazany damytýǵa arnalǵan bas jospar týraly baiandap, aimaq zamanaýi ári ekonomikalyq órleýge qolaily keńistikke ainalýy tiis ekenin aitty.
Al Adjai Banga Beibitshilik keńesiniń qarjy mehanizmderi ashyqtyq pen qarajatty naqty maqsattarǵa baǵyttaý qaǵidattaryna negizdeletinin jetkizdi.
Halyqaralyq turaqtandyrý kúshteriniń jetekshisi Djasper Djeffers Gazadaǵy qaýipsizdik sharalary týraly málimdedi.
Sondai-aq Gazany basqarý jónindegi ulttyq komitettiń basshysy Ali Shaat qaita qalpyna keltirý jumystaryn úilestirý jáne halyqaralyq seriktestermen yqpaldastyq joldaryn usyndy.
