Búgin elordada Qazaqstan musylmandary dini basqarmasynyń 30 jyldyǵyna orai IV respýblikalyq imamdar forýmy ótip jatyr. Osyǵan qarai QR Prezidenti Qasym-Jomart Toqaev pen Elbasy Nursultan Nazarbaev jiynǵa qatysýshylarǵa quttyqtaý joldady, dep habarlaidy QazAqparat.
Qazaqstan Prezidenti Qasym-Jomart Toqaev IV respýblikalyq imamdar forýmynyń delegattaryna beine úndeý jariialady.
«Qurmetti forýmǵa qatysýshylar!
Barshańyzdy Qazaqstan musylmandary dini basqarmasynyń otyz jyldyǵymen shyn júrekten quttyqtaimyn!
Bul – búkil musylman qaýymy úshin aitýly oqiǵa.
Dini basqarma Egemendiktiń alǵashqy jyldarynan bastap qoǵamdaǵy turaqtylyq pen tynyshtyqty saqtaýǵa atsalysyp keledi.
Sondai-aq, elimizdegi dástúrli islamdy damytýǵa zor úles qosýda.
Biylǵy pandemiia kezinde dini basqarma kóptegen qaiyrymdylyq sharasyna uitqy boldy.
Jurtshylyqty tatýlyq pen syilastyqqa shaqyrý asa mańyzdy. Bul mindetti bizdiń din basshylarymyz abyroimen atqarýda.
Álemde dini alaýyzdyq órshigen qazirgidei kúrdeli kezeńde din qyzmetkerleriniń róli airyqsha.
Sondyqtan, el ishinde júrgiziletin aǵartýshylyq jumystardyń mazmuny jáne sapasy únemi nazarda bolýy kerek.
Meshitterde árdaiym imandylyqqa, adamgershilikke úndeitin ýaǵyzdar aitylǵany jón.
Sondai-aq, bilim men ǵylymǵa qushtarlyq, Otanǵa degen súiispenshilik qasietterin dáripteýimiz kerek.
Azamattarymyzdyń dini turǵydan saýatty bolýyna jáne jat aǵymdardyń jeteginde ketpeýine sizderdiń qosar úlesterińiz mol.
Imamdar men din qyzmetshileri osy jaýapty mindetti keleshekte de oidaǵydai atqaratynyna senemin.
Qurmetti imamdar, forým delegattary!
Sizderdiń saýapty isterińiz árdaiym elimizdiń bereke-birligin nyǵaitýǵa arnalǵan. Mundai igi jumys qashanda erekshe qurmetke laiyqty.
Sondyqtan, din salasyn damytýǵa airyqsha úles qosqan birqatar imamdar men ǵalymdarǵa búgin memlekettik marapattar tabys etiledi.
Barshańyzdy quttyqtaimyn!
Forým jumysy jemisti bolsyn!», - delingen úndeýde.
Marapattalǵandardyń tizimi:
1. Bekaidar Ámire – Shymkent qalasynyń «Sheih Muhammed sadyq» meshitiniń bas imamy;
2. Myrzabaev Kenjeáli Qońyratbaiuly – Almaty qalasynyń «Qalqaman» meshitiniń bas imamy;
3. Amanqulov Asylhan Ómirzaquly – Almaty qalasynyń «Ál-Hamid» meshitiniń bas imamy;
4. Smanov Ábdijappar Shákiruly – Túrkistan oblysynyń «Saryaǵash» medrese-kolledji direktorynyń orynbasary;
5. Dáýrenbekov Ábdimútáli Qainazaruly – Aqtóbe qalasynyń «Aqtóbe» medrese-kolledjiniń direktory;
6. Qulmuhammed Mahambet Pirmanuly – «Ábý Hanifa» medrese kolledjiniń direktory;
7. Rahymjan Saǵynai Qabdýlýahituly – «Aqniet» aqparattyq nasihattaý jáne ońaltý ortalyǵy, teolog-keńesshi;
8. Týleshov Zamir Qarataiuly - «Aqniet» aqparattyq nasihattaý jáne ońaltý ortalyǵy, bólim bastyǵy.
Al QR Memlekettik hatshysy Qyrymbek Kósherbaev Qazaqstan musylmandary dini basqarmasynyń 30 jyldyǵyna orai ótkizilip otyrǵan IV respýblikalyq imamdar forýmyn ashyp, Elbasy Nursultan Nazarbaevtyń quttyqtaý sózin oqyp berdi.
«Sizderdi jáne elimizdiń barsha musylman jamaǵatyn derbes Qazaqstan musylmandary dini basqarmasynyń 30 jyldyǵyna orai ótkizilip otyrǵan respýblikalyq imamdar forýmynyń ashylýymen quttyqtaimyn!.
1990 jyly 12 qańtarda burynǵy Ortalyq Aziiadaǵy birlestikten bólinip, jeke shańyraq kótergen basqarma osy merzim ishinde elimizde dini senim bostandyǵy nyǵaiyp, qoǵamymyzda islam dininiń órkendeýi jolynda aýqymdy ister atqardy. Respýblikamyzdaǵy ózge de dástúrli dindermen, konfessiialarmen qurmet pen tózimdilikke negizdelgen qarym-qatynas ornatyp, elimizdiń beibit jaǵdaiynda qarqyndy damýyna súbeli úlesin qosa bildi. Osy jyldarda milliondaǵan qazaqstandyqtar keshegi keńestik zamanda qol úze bastaǵan islam dinine qaitap oralyp, imandylyqqa bet burdy. Elimizde meshitter sany buryn bolmaǵan jaǵdaida ósti. Dini bilim beretin joǵary jáne arnaýly oqý oryndary ashyldy. Basqarma halyqaralyq bailanysty da nyǵaitty. Osynyń bári jalpy qaýymnyń bilim deńgeiiniń artýyna, islam dinin ustanatyn otandastarymyzdyń damýyna yqpal etti.
Qazirgi tańda álemdi jailaǵan koronavirýs indetimen iri derjavalar arasynda tiketires týyndap, aýyr ekonomikalyq jáne saiasi daǵdarystardy bastan keship júrmiz. Munyń ózi adamdardyń júikesine qosymsha salmaq salmai, dini nanym senim jumystaryn arttyra túsý kerek. Osyndai jaǵdaida Qazaqstan musylmandary dini basqarmasy qyzmetkerleriniń jaýapkershiligi arta túsedi. Sizder óz dinderinińizdi únemi jetildirip otyrý arqyly qasietti islam dininiń qadir-qasietin halyqqa durys túsindirip qalyń jurtshylyqqa úlgi bolýylaryńyz kerek dep oilaimyn. Búgingi forýmda jumystaryńyzǵa tabys tileimin!»,-dedi Nursultan Nazarbaev.
