Prezident Qasym-Jomart Toqaev Natalia Slekishinaǵa raqymshylyq jasady. Aqparatty Prezident janyndaǵy raqymshylyq jasaý máseleleri jónindegi komissiia múshesi, adam quqyqtary jónindegi ýákil Elvira Ázimova rastady, - dep habarlaidy Tengrinews.kz.
"Kóp jaǵdaida raqymshylyq jasaý kezdeisoq qylmys jasaǵan adamdarǵa qoldanylady. Natalia Slekishina jaǵdaiynda raqymshylyq jasaý aktisi quqyq qorǵaý organdarynyń qyzmetkerleri tarapynan oǵan jasalǵan zorlyq-zombylyq deregin memlekettiń moiyndaýymen de bailanysty. Túrmedegi zorly-zombylyq búkil álemde adamǵa táýeldi jaǵdaiyn qoldana otyryp, qatygezdik jasaý formalarynyń biri sanalady", - dedi Elvira Ázimova.
Qazaqstandaǵy adam quqyqtary jónindegi ýákil Nataliaǵa qatysty barlyq mán-jai nazarǵa alynǵanyn, osyǵan bailanysty buryn sot qylmystyq jazany oryndaýdy keiinge qaldyrý týraly sheshim qabyldaǵanyn qosty.
"Sol kezden bastap bes jyl boiy ol ózin úlgili ana retinde kórsetip, óz betinshe jumysqa ornalasty jáne ekonomikalyq turǵydan ózin-ózi qamtamasyz etti. Probatsiialyq baqylaý kezeńinde onyń minez-qulqyna shaǵymdar túsken joq. Qazaqstan Prezidenti qabyldaǵan raqymshylyq jasaý aktisi - bul meiirimdilik pen izgilik, memleket tarapynan senim aktisi", - dep qosty Elvira Ázimova.
Onyń aitýynsha, IIM tarapynan osy jaǵdaidan tiisti sabaq alý óte mańyzdy. Mundai qylmystarǵa jol bermeý jáne olardy jasaǵany úshin kinálilerdi qatań jazalaý sharalary qabyldanady.
"Qazirgi ýaqytta IIM túbegeili reformalardy, sonyń ishinde penitentsiarlyq júie iske asyp jatyr. Júrgizilip jatqan reformalar azamattardyń qadir-qasietine qol suǵýdyń mundai jaǵdailaryn boldyrmaýǵa múmkindik beredi dep úmittenemiz", - dep qorytyndylady ombýdsmen.
2015 jyldyń mamyrynda Natalia Slekishin segiz jylǵa bas bostandyǵynan aiyrylǵan. Ol "Iri mólsherde múlikti urlaý úshin jasalǵan qaraqshylyq" baby boiynsha kináli dep tanylǵan.
