Foto: Aqorda
Barlyq deńgeidegi máslihat depýtattarynyń III respýblikalyq forýmynda sóilegen sózinde Memleket basshysy Qasym-Jomart Toqaev óńirlik saiasatty jetildirý, jergilikti biýdjetterdiń tiimdiligi jáne máslihattardyń rólin kúsheitý máselelerine toqtaldy, dep habarlaidy Ult.kz.
Prezident forýmnyń elimiz úshin mańyzy erekshe ekenin atap ótti. Onyń aitýynsha, jiynǵa eldiń barlyq óńirinen kelgen jergilikti bilik ókilderi qatysyp otyr. Qazirgi tańda zalda milliondaǵan qazaqstandyqtyń múddesin qorǵaityn eki myńǵa jýyq depýtat jinalǵan.
«Sizder halyqpen tyǵyz jumys istep júrsizder. Jurttyń muń-muqtajyn, talap-tilegin jaqsy bilesizder. Sondyqtan men Memleket basshysy retinde sizder atqaryp jatqan jumysty udaiy basty nazarda ustaimyn», – dedi Prezident.
Memleket basshysy Qazaqstanda aýqymdy reformalar júrgizilip jatqanyn aityp, olardyń barlyǵy halyqtyń ál-aýqatyn arttyrýǵa baǵyttalǵanyn jetkizdi. Onyń sózinshe, memlekettik basqarý júiesin, ekonomikany jáne áleýmettik salany jańǵyrtý barysynda máslihattardyń róli airyqsha.
Prezident «Qýatty aimaqtar – qýatty el» qaǵidaty aiasynda máslihattardyń bedeli artqanyn atap ótti. Sonyń nátijesinde ókildi organdar memlekettik basqarý júiesindegi mańyzdy institýttardyń birine ainalǵan.
Sonymen qatar Qasym-Jomart Toqaev óńirlerdiń qarjylyq derbestigin kúsheitý baǵytyndaǵy jumystarǵa toqtaldy. Onyń aitýynsha, ótken jyly aýyldyq okrýgterdiń biýdjeti 442 milliard teńgeden asty, al onyń úshten biri – eldi mekenderdiń óz tabysy. Búginde aýyldyq okrýgterdiń ortasha biýdjeti 190 million teńgege jetken.
Prezidenttiń aitýynsha, biyldan bastap aýyldyq okrýgter qosymsha tabys kózderine ie bolady. Atap aitqanda, keń taralǵan paidaly qazbalardy óndirýge, jerasty sýlary men emdik balshyqtardy paidalanýǵa salynatyn salyqtar jergilikti biýdjetke túsedi. Sondai-aq Úkimet zańdy tulǵalar men jeke kásipkerlerdiń múlik salyǵynyń bir bóligin tórtinshi deńgeidegi biýdjetterge berý máselesin pysyqtap jatyr.
Budan bólek, aimaqtarǵa jekelegen qyzmet túrlerine arnalǵan litsenziialyq alymdar men ekologiialyq aiyppuldardan túsetin qarajatty berý múmkindigi qarastyrylýda. Prezidenttiń aitýynsha, mundai tabys eń aldymen sol óńirdiń damýyna jumsalýy tiis.
Memleket basshysy máslihattardyń negizgi mindeti – osy qarajattyń tiimdi jumsalýyn qatań baqylaý ekenin aitty.
Sonymen qatar Prezident jergilikti biýdjetterdi josparlaý men oryndaý sapasyna qatysty syn aitty. Onyń sózinshe, qazirgi tártip boiynsha depýtattarǵa biýdjet bekitiler kezde tek jalpy málimet usynylady, al tolyq túsiniktemeler berilmeidi. Kóp jaǵdaida biýdjet jobasy máslihattarǵa sońǵy sátte jiberiledi.
«Sonyń saldarynan qarajat halyqtyń naqty qajettiligin ótemeitin, tiimsiz jobalarǵa jumsalyp ketetin jaǵdailar bolady. Eshkimge naqty jaýapkershilik júktelmegen soń, másele suraýsyz qalady», – dedi Qasym-Jomart Toqaev.
Osyǵan bailanysty Prezident ókildi organdar biýdjetti josparlaý úderisine eń basynan bastap qatysýy tiis ekenin atap ótti. Sonymen birge bul talqylaýlar memleket pen óńir múddesine negizdelip, popýlizm men lobbizmge jol bermeýi kerek ekenin aitty.
Memleket basshysy ákimdikter janyndaǵy biýdjettik komissiia quramyna tájiribeli jáne bedeldi máslihat depýtattaryn engizýdi usyndy. Bul qarjynyń tiimdi jumsalýyn baqylaýǵa múmkindik beredi.
