Foto: Akorda.kz
Memleket basshysy Qasym-Jomart Toqaev Naýryz meiramyna arnalǵan is-sharalarǵa qatysyp, barsha qazaqstandyqty Ulystyń uly kúnimen quttyqtady, dep habarlaidy "Ult aqparat" Aqordanyń resmi saityna silteme jasap.
«Naýryz – jyl basy, halqymyz ejelden toilaǵan kóktem merekesi. Bul – halyq asyǵa kútetin asa erekshe meiram, qystyń yzǵary qaitatyn, kóktem shýaǵyn tógetin sát. Tabiǵat túlep, tirshilik jańaratyn mezgil. Elimiz Áz-Naýryzdy árdaiym yrysty yntymaqtyń bastaýyna balaǵan. Alystaǵan aǵaiyn Ulys kúni tatýlasyp, qaita qaýyshqan. Jurt bir-birine aqjarma tilekterin aitqan. Kópshilik ortaq dastarhannan dám tatyp, qariialar jastarǵa batasyn bergen. Babalarymyz Naýryz toiyn jasampaz eńbektiń meiramy sanaǵan. Bulaqtyń kózin ashyp, aǵash otyrǵyzǵan. Elge paidasy tietin igi ister atqarǵan. Bir sózben aitsaq, Ulystyń uly kúni – jańa ómirdiń jarshysy», – dedi Prezident.
Memleket basshysy osydan bir jyl buryn tyń bastama kóterip, elimizdi túbegeili jańǵyrtý úshin aýqymdy reformalar usynǵanyn eske saldy.
«Halyq bul bastamalardy qoldady. Biz josparymyzdy bir jylda tabysty júzege asyrdyq. Referendým arqyly Konstitýtsiiaǵa mańyzdy ózgerister engizdik. Bilik júiesin qaita jasaqtaý úshin mańyzdy saiasi sharalar iske asyryldy. Keshe ǵana ótken Májilis pen máslihattar sailaýy – búkil reformalarymyzdy alǵa bastaityn óte mańyzdy qadam. Bul sailaý – aýqymdy ózgeristerdiń laiyqty jalǵasy. Osylaisha, memleketimiz jańa saiasi dáýirge qadam basty. Jalpy, elimizdiń jańa saiasi kelbeti qalyptasty. Tarihi sát Ulystyń uly kúnimen tuspa-tus kelip otyr. Munyń zor simvoldyq máni bar. Jańa Qazaqstannyń búgingi beinesi Áz-Naýryzben tolyq úndesedi, iaǵni Ulystyń uly kúninde qasietti Otanymyz múlde jańa sipatqa ie boldy. Muny dúnie júziniń kóptegen elderi moiyndap otyr. Endi saiasi júiesi tolyq jańǵyrǵan elimiz tyń qarqynmen damidy. Bul reformalar ekonomikanyń ósýine, halyq tabysynyń artýyna jol ashady. Reformalarymyz mindetti túrde jalǵasyn tabady. Biz jan-jaqty damyǵan qýatty memleket bolamyz. Bul – negizgi maqsatymyz», – dedi Qasym-Jomart Toqaev.
Sonymen qatar Memleket basshysy jasampaz halqymyzdyń keleshegi jarqyn bolatynyna senim bildiretinin aityp, memlekettiń múddesi bárinen biik ekenine nazar aýdardy. Prezident el bolashaǵy óskeleń urpaqtyń qolynda ekenin atap ótip, otandastarymyzdy elimizdiń damýyna úles qosýǵa shaqyrdy.
«Birlik túbi – bereke» deidi halqymyz. Qoǵamda kelisim jáne tatýlyq bolsa, elimiz kózdegen maqsatyna jetedi. Bizdiń maqsatymyz – aiqyn. Bul – Ádiletti Qazaqstandy qurý. Osy jolda bárimiz bir kisidei jumylaiyq, ardaqty aǵaiyn! Biyl qasietti Ramazan aiy Ulystyń uly kúnimen qatar keldi. Oraza ustaityn jamaǵattyń nieti qabyl bolsyn! Ár shańyraqqa Qydyr qonyp, baq darysyn! Jańa jyl qut-bereke ákelsin! Ulys oń bolsyn! Aq mol bolsyn!» – dedi Qasym-Jomart Toqaev.
Budan keiin Memleket basshysy «Júrek jylýy» qaiyrymdylyq aktsiiasyna qatysty. Aktsiianyń máni – naýryz aiy boiyna halyqtyń áleýmettik osal toptaryna qamqorlyq kórsetip, kópbalaly otbasylardan, múmkindigi shekteýli jandardan, zeinetkerlerden kelip túsken hattarda jazylǵan ótinish-tilekterdi oryndaý.
Astana Jastar resýrstyq ortalyǵynyń eriktileri Memleket basshysynan sandyqtan alǵashqy hatty alyp oqýdy surady.
Qasym-Jomart Toqaev hat iesiniń tilegi oryndalatynyn jetkizip, osynaý igi isti bastaǵan jastarǵa rizashylyǵyn bildirdi.
Sonymen qatar Memleket basshysy «Arǵymaq» at sporty-saýyqtyrý kesheninde uiymdastyrylǵan «Jeti Qazyna» mádeni-sport is sharasyna qatysty.
Aldymen Prezident tazy itterdiń kórmesin tamashalady. «Nomad» ulttyq saiatshylyq» qoǵamdyq qorynyń tóraǵasy Bolat Qunanbaev tazyny saqtaý, ósirý baǵytynda atqarylyp jatqan jumystar jóninde baiandady.
Memleket basshysy tazyny halyqaralyq deńgeide dáripteý qajet ekenin aitty.
«Qumai tazy – erekshe janýar, qazaqtyń jeti qazynasynyń biri. Biz tazy men tóbet itterdi halyqaralyq deńgeide keńirek dáripteýimiz kerek. Syrtqy ister ministrligi de mindetti túrde atsalysýǵa tiis. Tazyǵa erekshe kútim, qamqorlyq qajet. Bul mańyzdy is kásibilikti talap etedi. Sol úshin arnaiy zań qabyldadyq», – dedi Qasym-Jomart Toqaev.
Sondai-aq Memleket basshysy Nomad Stunts tobynyń ónerin tamashalady. Kaskaderler aýdaryspaq, qyz qýý, teńge ilý, sadaq atý siiaqty ulttyq oiyn túrleri men kóshpendilerdiń áskeri sherýin kórsetti.
Nomad Stunts tobynyń jetekshisi Jaidarbek Kúnǵojinov Memleket basshysyna 2020 jyly kaskaderlerge beriletin Taurus World Stunt Awards júldesin jeńip alǵanyn aitty.
Prezident qazaqtyń qaisarlyǵy men ulttyq sportymyzdy álemdik kinematografiiada dáriptep júrgen Nomad Stunts tobyna sáttilik tilep, Jaidarbek Kúnǵojinovke er-toqym syilady.
Sonymen qatar Memleket basshysy Shámshi Qaldaiaqovtyń shyǵarmashylyǵyna arnalǵan otandyq óner juldyzdarynyń kontsertin tamashalady.
«Qazaqstan» ortalyq kontsert zalynda belgili ánshiler Roza Rymbaeva, Maira Muhamedqyzy, Meirambek Bespaev, Rýhiia Baidúkenova, Álisher Kárimov, Qanat jáne Svetlana Aitbaevtar, sondai-aq Astana qalasynyń estradalyq-simfoniialyq orkestri, Jas kórermen mýzykalyq teatrynyń solisteri jáne basqa da ónerpazdar án shyrqady. Kontsertke kompozitordyń jubaiy Jámilá Qaldaiaqova da qurmetti qonaq retinde qatysyp, uly Muhtar men nemeresi Aisulý Qaldaiaqovtar óner kórsetti.
