Prezident Qasym-Jomart Toqaev Úkimettiń keńeitilgen otyrysynda qosymsha bilim berý salasyna toqtalyp, "Artsport" jobasynyń júzege asyrylýyn synǵa aldy, - dep habarlaidy "Ult aqparat".
"Kelesi másele – qosymsha bilim berý. Bul – óskeleń urpaqtyń qarym-qabiletin damytý úshin qolǵa alynǵan bastama. Qosymsha sporttyq jáne shyǵarmashylyq bilim berý isine memleket tapsyrysy boiynsha qarjy bólinetin boldy. Bul qadam úiirmeler men sektsiialarǵa qatysatyn balalardyń sanyn 70 paiyzǵa deiin arttyrdy. Muny strategiialyq turǵydan durys sheshim boldy dep sanaimyn.
Degenmen joba iske qosylǵan jyly birqatar olqylyqtarǵa jol berildi. Iaǵni, qarjy máselesine jáne tiisti portaldyń, «Artsport» jumysyna qatysty qatelikter boldy. Qarjyny artyq jumsaý, alaiaqtyq, ashyqtan-ashyq jymqyrý bastaldy. Ata-analar balalaryn birden birneshe úiirmege beretin boldy. Ókinishke orai, mundai teris piǵyl basqa balalardyń jolyn kesip otyr. Kemshiliktiń bárin túzetip, osy igi bastamany jalǵastyrý qajet. Ákimdikter jáne máslihattar qosymsha bilimge bólinetin biýdjet qarajaty jetpei qalýy múmkin dep alańdap otyr" - dedi Memleket basshysy.
Prezidenttiń aitýynsha, bilimge salynǵan qarajat – memleket úshin eń basty investitsiia bolýy kerek.
"Bul – óte mańyzdy másele. Túptep kelgende, damýdyń birden-bir joly – bilim salasy. Sondyqtan budan eshkim utylmaityny sózsiz. Úkimet pen ákimder jurtshylyqpen birlesip, jobany jetildirýge tiis. Ony sapaly ári tiimdi jasaý qajet.
Naqty ǵylymdar men injeneriia salasy boiynsha qosymsha bilim berýge airyqsha nazar aýdarý kerek. Balalardy dene shynyqtyrý jáne akademiialyq turǵydan birdei damytý qajet. Aýyldyq jerde turatyn balalarǵa basa mán bergen jón. Barlyq aimaqtaǵy balalardyń qosymsha bilim alýyna múmkindigi bolýǵa tiis.
Quzyrly ministrlik pen ákimdikter jobanyń júzege asyrylýyn rettep, jiti baqylaýy qajet. Buǵan deiin bólingen qarjynyń jumsalýyn tekserý kerek. Bul mindet Bas prokýratýraǵa júkteledi. Anyqtalǵan kemshilikterdi Úkimetpen birlesip joiý qajet" - dedi Toqaev.
