Memleket basshysy Qasym-Jomart Toqaev Úkimettiń áleýmettik mańyzy bar azyq-túlik baǵasyn ustap turý jumysyn synǵa aldy, dep habarlaidy "Ult aqparat".
«Qazirgi áleýmettik mańyzy bar azyq-túlik taýarlarynyń baǵasyn ustap turý quraldary tiimsiz bolyp otyr. Jergilikti biýdjetten saýda jelilerine azyq-túlik taýarlaryn arzanǵa satý úshin 30 mlrd teńgeden astam is júzinde tegin qaryz bólindi. Qazirgi jaǵdaida bul sheshim jaman emes. Alaida, bul sharanyń naryqqa áseri 1-4% aralyǵynda ǵana», - dedi Prezident Úkimettiń keńeitilgen otyrysynda.
Memleket basshysy turaqtandyrý qorlarynda da osyndai jaǵdai ekenin jáne naryqtaǵy turaqtandyrý qorlary ónimderiniń úlesi 4%-dan aspaitynyn jetkizdi.
«Fermerlerde óz ónimderin saqtai otyryp, forvardtyq satyp alý quraly da jetkilikti iske qosylmaǵan. Ákimder ortalyqqa bas shulǵyp otyrmaýy kerek, óńirler úshin jaýapkershilik óz qoldaryńyzda, sondyqtan Úkimetke «Atameken» UKP-men birlesip, qoldanystaǵy quraldardyń tiimdiligin baǵalaýdy jáne neǵurlym tiimdi sharalar paketin usynýdy tapsyramyn», - dedi Qasym-Jomart Toqaev.
Aita keteiik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeitilgen otyrysy ótti.
