Foto: Sn.kz
Memleket basshysy Qyzylordada ótip jatqan Ulttyq quryltaida Qazaqstannyń tarihi murasyn ǵylymi turǵyda zerdeleý jáne ony halyqaralyq deńgeide dáripteý baǵytynda atqarylyp jatqan jumystarǵa toqtalyp, birqatar aýqymdy jobany atap ótti, dep habarlaidy Ult.kz.
Prezidenttiń aitýynsha, biyl kóktemde Joshy han týraly kóp seriialy derekti filmdi túsirý jumystary aiaqtalady. Atalǵan joba alǵash ret Atyraýda ótken Ulttyq quryltai otyrysynda jariialanǵan. Filmniń tusaýkeseri bedeldi halyqaralyq platformalarda ótpek.
Memleket basshysy bul týyndy Altyn Orda brendin álemge tanytýǵa yqpal etetinin atap ótip, tarihi taqyrypty igerýde vizýaldy kórkemdikpen qatar mazmunnyń tereńdigi men ǵylymi negiziniń mańyzdylyǵyna nazar aýdarý qajettigin aitty.
Osyǵan bailanysty Prezidenttiń tapsyrmasymen mamyr aiynda Altyn Orda tarihyna arnalǵan halyqaralyq simpoziým uiymdastyrylady. Is-sharaǵa álemniń jetekshi ǵalymdary shaqyrylady.
Sonymen qatar Qasym-Jomart Toqaev ortaq túrki órkenietin zertteýge de erekshe kóńil bólinetinin jetkizdi. Qyrkúiek aiynda Resei jáne ózge de elderdiń ǵalymdarynyń qatysýymen «Uly Altai – túrkilerdiń altyn besigi» atty halyqaralyq konferentsiia ótkizý josparlanyp otyr.
Prezident bes jyl buryn jariialanǵan «Táýelsizdik bárinen qymbat» atty maqalasynda Qazaqstannyń jańa akademiialyq tarihyn daiyndaý mindeti qoiylǵanyn eske saldy. Memleket basshysynyń aitýynsha, zamanaýi ǵylymi tásilderge negizdelgen jeti tomdyq akademiialyq tarihty ázirleý jumystary jyl sońyna deiin tolyq aiaqtalady.
Bul irgeli ǵylymi eńbek Qazaqstannyń memlekettiligin nyǵaitýǵa jáne ulttyq tarihi sanany qalyptastyrýǵa mańyzdy úles qosady. Sondai-aq atalmysh ǵylymi oqiǵanyń Qazaqstan Táýelsizdiginiń 35 jyldyǵymen tuspa-tus kelýi simvoldyq mánge ie ekeni atap ótildi.
