QR Premer-Ministriniń orynbasary Eraly Toǵjanov Memleket basshysy zeinetaqy jinaqtarynyń shekti mejesin kóterý merzimin uzartý sheshimi boiynsha halyqqa úndeý jasady, dep habarlaidy QazAqparat.
Onyń aitýynsha, 2022 jylǵy 1 sáýirge deiin shamamen 500 myń azamatqa ózderiniń zeinetaqy jinaqtarynyń bir bóligin: turǵyn úi jaǵdailaryn jaqsartýǵa, quny joǵary emdelý aqysyn tóleýge nemese jeke basqarýshy kompaniialarǵa berý maqsatynda paidalanýǵa múmkindik beredi.
Sondai-aq, jyl sońyna deiin zeinetaqy jinaqtary esebinen «Otbasy banktegi» depozitti tolyqtyrý fýnktsiiasy iske qosylady.
«Búgin Prezidenttiń tapsyrmasyn jedel oryndaý maqsatynda jinaqtardyń shekti mejesin kóterý merzimin uzartý týraly Úkimet sheshiminiń jobasy ázirlendi, ol jaqyn arada qabydanatyn bolady. Osy kúnge deiin zeinetaqy jinaqtarynyń bir bóligin paidalaný quqyǵyn 606 myńnan astam adam barlyǵy 2,2 trln teńge kóleminde qoldandy», - dedi Eraly Toǵjanov.
Onyń ishinde turǵyn úi jaǵdailaryn jaqsartýǵa – 527,2 myń adam (2 trln astam teńge), emdelý aqysyn tóleýge – 75,7 myń adam (68 mlrd teńge) berilgen. Al 3,2 myń adam 5 mlrd teńge bolatyn jinaqtaryn jeke basqarýshy kompaniialarǵa bergen.
«Bul rette zeinetaqy júiesiniń negizgi mindeti – azamattardyń zeinetkerlikke shyqqannan keiingi jetkilikti tabysyn qamtamasyz etý ekenin atap ótkim keledi. Sondyqtan, shektilik deńgeii de kóterilgen bolatyn. Azamattarymyz jinaqtyń shekti mejesinen joǵary somalardy paidalaný olardyń bolashaq zeinetaqysynyń mólsherin edáýir qysqartatynyn túsinýi tiis. Sondyqtan zeinetaqy jinaqtarynyń shekti mejesi bolashaq zeinetkerlerdiń múddelerin qorǵaý úshin belgilenedi. Sondyqtan, bul múmkindikti aqylmen paidalý kerek dep oilaimyn, asa muqtaj bolǵanda, emdelý nemese páter alý qajet bolǵanda osy múmkindikke júgingen jón», - dedi Toǵjanov.
