Elorda ákimdigi ataýly áleýmettik kómekti zańsyz alǵan otbasylardy sotqa berýi múmkin. Bul týraly búgin qalalyq jumyspen qamtý jáne áleýmettik qorǵaý basqarmasynyń basshysy Sáýle Nurǵojina aitty, dep habarlaidy Sputnik Qazaqstan.
Nurǵojinanyń aitýynsha, birinshi sáýirden bastap ataýly áleýmettik kómek alýǵa ótinish bergen 1118 otbasynyń ótinishi maquldanbaǵan.
"Ataýly áleýmettik kómekti taǵaiyndaǵan kezde, otbasynyń turmystyq jaǵdaiy tekseriledi. Ákimdik apparaty janyndaǵy ýchaskelik komissiialar árbir úige baryp, barlyǵyn tekserip shyqty. Nátijesinde 1118 otbasynyń ótinishi maquldanbady. Biraq, kottedj, záýlim sarailarda turyp, áleýmettik kómek alǵandar joq", - deidi basqarma basshysy qalalyq máslihattyń otyrysynda.
Alaida, onyń aitýynsha, tabysyn jasyryp, memleketten kómek alǵan otbasylar bar eken. Olardyń arasynda jeke kásipkerler, áskeriler de bar.
"Biz inventarizatsiia júrgizdik. Áleýmettik kómek alýǵa ótinish bergen kezde, tabysyn jasyrǵan otbasylardy anyqtadyq. Iaǵni, jumys berýshi tabysty durys kórsetpegen. Tólemdi kelesi toqsanda jasaǵan. Qazir olardyń tizimi jasaldy. Eńbek inspektsiiasymen birlesip, árbir otbasymen jeke-jeke jumys isteimiz", - deidi ol.
Ákimdik aqshany biýdjetke óz erkimen qaitarmaǵan otbasylardy sotqa berýi múmkin.
"Birinshi, otbasyǵa aqshany óz erkimen biýdjetke qaitarý týraly habarlama jiberemiz. Eger, olar qaitarmasa, materialdardy sot organdaryna tapsyramyz", - dedi Nurǵojina.
Qazir, basqarmanyń málimetinshe, elordada 5 669 otbasy ataýly áleýmettik kómek alady. Ataýly áleýmettik kómek týraly zańǵa sáikes, otbasy tabysyn rastaýy tiis. Kiris otbasynyń ár múshesine shaqqanda eń tómengi kúnkóris deńgeiiniń 70 protsentinen aspaýy kerek.
