Shymkent politsiiasynyń ǵimaratynda kóz jumǵan qostanailyqty ustaǵan sát taspalanǵan beinejazba jariia boldy.
Qoǵamdyq rezonans týdyrǵan oqiǵaǵa qatysty videony Mihail Kozachkov esimdi jýrnalist Telegram-arnasynda bólisken, dep habarlady Sputnik agenttigi "Astana" arnasyna silteme jasap.
Avtor beinebaqylaý kamerasyna jazylǵan eki videony jariialaǵan. Onyń birinshisi dámhana syrtynda túsirilgen. Onda dámhana aldynda Nurbolat Jumabaevtyń alańsyz telefonmen sóilesip júrgenin kórýge bolady. Kenetten oǵan arnaiy jasaqtyń birneshe qyzmetkeri tap bergen. Jerge jatqyzyp, qolyn qaiyryp, tepkilegenderi anyq baiqalady.
Al ekinshi videoda jaibaraqat tamaqtanyp otyrǵan onyń dosy Sergei Petrovty arnaiy jasaq dámhana ishinde ustaǵany jazylyp qalǵan. Kúdiktiler politsiiaǵa esh qarsylaspaǵany kórinedi.
Eske sala keteiik, 8 jeltoqsanda Shymkenttegi politsiia departamentiniń ǵimaratynda tergeýge jetkizilgen 31 jastaǵy Nurbolat Jumabaev kóz jumdy. Politsiia marqumdy dosymen birge shetel kóliginiń urlyǵyna qatysy bolýy múmkin degen kúdikpen ustaǵan bolatyn. Máiithanada júrgizilgen sot-meditsina saraptamasy qostanailyq azamattyń politsiia soqqysynan qaitys bolǵanyn dáleldep bergen. Qazir atalǵan faktige qatysty tergeý jalǵasyp jatyr.
