Qazaqstandyq Iýliia Pýtintseva US Open týrniriniń shirek finalyna shyqty, dep habarlaidy "Ult aqparat".
Dúniejúzilik reitingide 35-orynda turǵan Iu.Pýtintseva tórtinshi ainalymda álemniń 15-inshi, osy dodanyń (júlde qory – 53,4 mln dollar) 8-raketkasy, horvatiialyq Petra Martichpen kezdesti.
Match US Open jarysynyń bas korty – Artýr Esh stadionynda boldy. Koronavirýs indetine bailanysty basqa dodalar siiaqty, AQSh-tyń ashyq chempionaty da kórermensiz ótýde.
Qazaqstandyq tennisshi biyl 25-ke tolsa, tájiribelileý qarsylasy 29 jasta edi. Bul olardyń ózara alǵashqy oiyny bolatyn.
Iu.Pýtintseva birinshi partiiada breikpen alǵa shyqty – 2:0. Taǵy bir breikpen óz geimin aldy – 5:0. Esep 1:5 bolyp, qazaqstandyq tennisshi setke dop bergende, P.Martich breik jasady. Degenmen Iýliia tórtinshi setbolyn paidalana bildi – 6:3.
Ekinshi set basynda qazaqstandyq sportshy úsh birdei breikpointyn múlt jiberdi. Esep 3:2 bolǵanda, tartysty geimde P.Martich breikpen alǵa ketti – 4:2. Budan keiin Iu.Pýtintseva meditsinalyq úzilis alǵanymen, horvatiialyq tennisshi setti taǵy bir breikpen túiindedi – 6:2.
Úshinshi, sheshýshi partiiada Iýliia breikpen alǵa shyqty – 1:0. Taǵy bir breik – 3:0. Sosyn esepti 5:1-ge jetkizdi. Esep 5:2 bolyp, Pýtintseva matchqa dop bergende, qarsylasy breik jasai aldy. Esep 4:5 bolǵanda, Martich ta meditsinalyq kómekke júgindi. Budan keiin Iýliia matchty jeńispen támamdai bildi – 6:4.
Tartysty báseke 2 saǵat 27 minýtqa sozyldy.
Osylaisha qazaqstandyq tennisshi óz sporttyq jolynda alǵash ret US Open týrniriniń shirek finalyna shyqty.
Iu.Pýtintseva shirek finalda álemniń 41-raketkasy, amerikalyq Djennifer Bredimen sheberlik baiqasady. D.Bredi tórtinshi ainalymda kútpegen jerden kezinde dúniejúzilik reitingte kósh bastaǵan, qazir 23-satyda turǵan germaniialyq Anjelika Kerberdi 6:1, 6:4 esebimen utyp ketti. Bul – osyǵan deiin «Úlken dýlyǵa» týrnirinde shirek finalǵa shyǵyp kórmegen amerikalyq sportshynyń ázirge eń joǵary tabysy.
