Serbiialyq Novak Djokovich segizinshi márte Aýstraliia ashyq chempionatynyń jeńimpazy atandy, dep habarlaidy "Ult aqparat".
Finalda álemniń 2-raketkasy Novak Djokovich pen reitingte 5-orynda turǵan aýstriialyq Dominik Tim bas júldeni sarapqa saldy.
Buǵan deiin qarsylastardyń on ret joldary toqailassa, sonyń altaýynda 32 jastaǵy serbiialyq tennisshiniń mereii ústem boldy.
N.Djokovich 16 márte «Úlken dýlyǵa» týrniriniń jeńimpazy atansa, sonyń jeteýi Aýstraliia ashyq chempionaty eken. Onyń ústine Novak Aýstraliia birinshiliginde finaldyq matchta jeńilip kórmegen.
Al 26 jastaǵy D.Tim buǵan deiin 2018 jáne 2019 jyldary Frantsiia ashyq chempionatynyń finalyna shyqqanymen, ekeýinde de utylyp qalǵan bolatyn.
Birinshi partiiada serbiialyq sportshy 3:0, 4:1 esebimen alǵa shyqty. Qarsylasy tarazy basyn teńestirgenimen, N.Djokovich bul setti bermedi – 6:4.
Esesine ekinshi jáne úshinshi sette D.Tim kúsh alyp ketti – 6:4, 6:2.
Degenmen tórtinshi partiiada N.Djokovich breik jasap, sol basymdylyǵyn paidalana bildi – 6:3.
Besinshi, sheshýshi partiiada esep 1:1 bolǵan mezette serbiialyq tennisshi breik jasai aldy – 2:1. Budan keiin D.Tim qarymta qaitaratyndai múmkindigin múlt jiberdi. Aqyry esep 5:4 bolyp, N.Djokovich matchqa dop bergende, qatelesken joq – 6:4.
Naǵyz finalǵa tán, tartysty ótken báseke tórt saǵatqa sozyldy.
Osylaisha N.Djokovich Aýstraliia chempionatynda segizinshi márte top jardy. Ol ótken jyly da úzdik shyqqan bolatyn. Sóitip serbiialyq sportshy dúniejúzilik reitingte qaitadan birinshi raketka atanady.
Aýstraliia birinshiliginde erler arasynda jekelei synda qazaqstandyqtar Aleksandr Býblik pen Mihail Kýkýshkin alǵashqy ainalymnan asa almady. Esesine olar juptyq synda tabysty óner kórsetip, el tennisi tarihynda tuńǵysh ret «Úlken dýlyǵa» týrnirinde jartylai finalǵa deiin jetti.
Eske sala keteiik, budan buryn áielder arasynda Aýstraliia chempionatynyń jeńimpazy anyqtalǵanyn, qazaqstandyqtardy utqan juptyń chempion atanǵanyn jazǵan bolatynbyz.
