Qazaqstannyń birinshi, álemniń 26-raketkasy Elena Rybakina Aýstraliia ashyq chempionatynyń úshinshi ainalymyna shyqty, - dep habarlaidy QazAqparat.
Osy «Úlken dýlyǵa» týrniriniń 29-raketkasy bolyp tirkelgen, 20 jastaǵy E.Rybakina ekinshi ainalymda reitingte 119-orynda turǵan belgiialyq Grete Minnenmen kezdesti. Belgiialyq sportshy negizgi dodaǵa irikteý saiystarynan keiin qosylǵan bolatyn. Qazaqstandyq tennisshi birinshi partiiada 6:3 esebimen basym tústi. E.Rybakina ekinshi sette de breik jasap, 3:1 esebimen alǵa shyqty. Aqyry sol basymdylyǵynan aiyrylǵan joq – 6:4. Báseke 1 saǵat 16 minýtqa sozyldy.
Osylaisha budan buryn «Úlken dýlyǵa» dodalarynda alǵashqy ainalymnan aspaǵan E.Rybakina qazirdiń ózinde sporttyq jolynda úzdik kórsetkishine qol jetkizip otyr. Qazaqstandyq sportshy úshinshi ainalymda álemniń 1-raketkasy, aýstraliialyq Eshli Bartimen sheberlik baiqasady. Ol ekinshi oiynynda sloveniialyq Polona Hertsogty 6:1, 6:4 esebimen tize búktirdi. Erler arasynda qazaqstandyqtar Aleksandr Býblik pen Mihail Kýkýshkin juptyq syndaǵy básekeni sátti bastady. Olar búgin germaniialyq Kevin Kravits pen Andreas Mesti 6:3, 7:6 (9:7) esebimen utty.
Qazaqstandyqtar ekinshi ainalymda aýstraliialyqtar Lleiton Hiýitt pen Djordan Tompson jáne ońtústikkoreialyqtar Dji Sýn Nam men Min-Kiý Songtyń qai jeńgenimen kortqa shyǵady. Eske sala keteiik, budan buryn Zarina Diiastyń Aýstraliia chempionatyn jeńispen bastap, Iýliia Pýtintsevanyń da ekinshi ainalymǵa shyqqanyn jazǵan bolatynbyz. Z.Diias ekinshi ainalymda reseilik Anna Blinkovamen, Iu.Pýtintseva amerikalyq Daniel Kollinzben kortqa shyǵady.
