Foto: freepik
Temirtaýda mektepte jarylǵysh zat baryn aityp, jalǵan aqparat taratqan oqýshy sottaldy, dep habarlaidy «Ult aqparat» Polisia.kz-ke silteme jasap.
Byltyr 6 jeltoqsanda Temirtaý qalasynyń tótenshe jaǵdailar bólimine belgisiz bireý telefon soǵyp, qala mektepteriniń birine jarylǵysh zat qoiylǵanyn habarlaǵan. Bul jalpy bilim berý mekemesinen oqýshylar men muǵalimder shuǵyl evakýatsiialandy.
Tekserý kezinde politseiler jarylǵysh zat tappaǵan. Qalalyq ekstremizmge qarsy kúres tobynyń qyzmetkerleri jalǵan aqparat taratqan adamdy ustady - ol sol mekteptiń 15 jastaǵy oqýshysy bolyp shyqty.
Oqýshy synyptasynyń uialy telefonyn paidalanyp, dabyl qaqqan. Jasóspirimniń aitýynsha, ol jai ǵana "ázildegen". Aldaǵy terroristik aktisi týraly kórineý jalǵan habarlaý deregi boiynsha qylmystyq is qozǵaldy.
Tergeý aiaqtalǵannan keiin barlyq material sotqa qaraýǵa jiberiledi. Memlekettik aiyptaýshynyń usynysy boiynsha sottalýshynyń jasy men ókinýin eskere otyryp, mámile túrindegi protsestik kelisim jasaldy.
Balany bir jylǵa bas bostandyǵyn shekteý úkimi shyǵaryldy. Sottalǵanǵa saǵat 22.00-den tańǵy saǵat 6-ǵa deiin turaqty turǵylyqty jerinen shyqpaý jáne probatsiia qyzmetin eskertpesten turǵylyqty jerin, jumysyn nemese oqýyn ózgertpeý mindeti júkteledi. Sondai-aq, oǵan oiyn-saýyq oryndaryna, túngi klýbtarǵa, barlarǵa, kafelerge, meiramhanalarǵa, oiyn mekemelerine jáne alkogoldik ónimder satatyn mamandandyrylǵan dúkenderge barýǵa tyiym salynady.
Sondai-aq, ol qoǵamǵa jat ómir saltyn ustanatyn adamdarmen qarym-qatynasta bolmaýy kerek. Osy shekteýlerdi buzǵan nemese jańa zańsyz áreketter jasaǵan jaǵdaida shartty jaza naqty jazamen aýystyrylýy múmkin. Úkim zańdy kúshine endi.
