Foto: Ammiac
Tarazda jekemenshik mektepte oqityn 11-synyp oqýshysy sot arqyly jyldar boiy ózimen aralaspaǵan ári materialdyq kómek kórsetpegen ákesinen aliment óndirip alýǵa qol jetkizdi. Bul týraly Joǵarǵy sot habarlady.
Oqýshy ai saiyn 68 myń teńge kóleminde oqý aqysyn tóleidi. Al 2008 jyly onyń ákesi eki balasyna, sonyń ishinde osy qyzyna qatysty ata-ana quqyqtarynan bas tartý týraly notarialdy túrde aryz jazǵan.
2018 jyly qyzdyń anasy men aǵasy qaitys bolǵan. Sodan beri ol ájesimen birge turyp keledi jáne tolyqtai sonyń qamqorlyǵynda. Ákesi osy ýaqytqa deiin eshqandai materialdyq kómek kórsetpegen, tipti qarym-qatynastan qashqaqtaǵan. Qyzy kómek suraǵan kezde onyń telefon nómirin buǵattap otyrǵany da belgili bolǵan.
Sotqa júgingen oqýshy óziniń qarjylyq qiyndyqqa tap bolǵanyn aitqan. Qazirgi tańda oqý men kúndelikti turmys shyǵyndarynyń barlyǵyn ájesi kóterip otyr. Al bar qarajat tek eń qajetti azyq-túlikke ǵana jetedi.
Sot otyrysynda ákesi talapty ishinara qanaǵattandyrýdy surap, basqa nekeden týǵan tórt balasy bar ekenin jáne nesie tólep júrgenin alǵa tartqan. Alaida onyń eńbekke qabiletti ekeni jáne birneshe kásiporynnan tabys tabatyny anyqtalǵan.
Sonymen qatar, sot sheshimi shyǵarylar kúni jaýapkerdiń jeke kásipker retinde tirkeýden shyqqany jáne oǵan deiin kóp uzamai taǵy tórt balaǵa ákelik quqyqty resimdegeni belgili boldy. Sot bul áreketterdi aliment mólsherin ádeii azaitýǵa baǵyttalǵan qadam retinde baǵalady.
Nátijesinde Taraz qalalyq soty ákeden qyzy mektepti aiaqtaǵanǵa deiin ai saiyn 17 AEK (66 844 teńge) mólsherinde aliment óndirip alý týraly sheshim shyǵardy. Ákesi bul sheshimge apelliatsiialyq shaǵym túsirgenimen, Jambyl oblystyq soty birinshi satydaǵy úkimdi ózgerissiz qaldyrdy.
Sot aktileri zańdy kúshine endi.
