Almaty oblysynyń Tekeli qalasynda 4 qabatty kóppáterli turǵyn úidiń birinde órt shyqty, dep habarlaidy QazAqparat TJM baspasóz qyzmetine silteme jasap.
Órt týraly habarlama Almaty oblysynyń TJD-syna saǵat 16.10-da kelip túsken.
«Joǵary dárejeli shaqyrtý boiynsha Tekeli, Taldyqorǵan qalalarynyń jáne Qarabulaq aýylynyń órt sóndirý bólimsheleriniń jasaqtary dereý jiberildi. Alǵashqy órt sóndirý bólimsheleri shaqyrtý ornyna belgilengen normativtik ýaqytta keldi. Páterdiń terezesinen jalyn baiqaldy, sondai-aq barlaý barysynda turǵyndardy evakýatsiialaý joldary qoiý tútin jáne ystyq bolǵany anyqtaldy. Órt kórshi páterler men ǵimarattarǵa qaýip tóndirdi», delingen habarlamada.
TJD qyzmetkerleri bir mezgilde órtti sóndire otyryp, azamattardy qutqarý jáne evakýatsiialaý jumystaryn uiymdastyrdy.
«6 adam qutqaryldy, onyń ishinde 3 bala, sondai-aq 11 adam, onyń ishinde 4 bala evakýatsiialandy. Órt ǵimarattyń shatyryna jáne kórshi páterlerge taralýyna jol berilmedi. Saǵat 16.48-de, 16 sharshy metrdi sharpyǵan hrt sóndirilgen (3-qabatta, eki bólmeli páter ishinde jihaz ben zat janǵan). Oqys oqiǵadan eshkim zardap shekpegen», delingen habarlamada.
Qazir órt qalai shyqqany anyqtalyp jatyr. Oqiǵa ornyna Almaty oblysy TJD Órt synaq zerthanasy jiberildi.
Órtti sóndirýge Almaty oblysy TJD-nyń 11 qyzmetkeri men 4 tehnikasy, «Órt sóndirýshi» JShS-nyń 3 qyzmetkeri men 1 tehnikasy, Qalalyq politsiia bóliminiń 3 qyzmetkeri men 1 tehnikasy jumyldyryldy.
