Tájiribeli mamandar stýdentterge dáris bere alatyn boldy. Bul týraly QR BǴM Bilim jáne ǵylym salasyndaǵy baqylaý komitetiniń tóraiymy Gúlzat Kóbenova aitty, dep habarlaidy QazAqparat.
«Qazirgi ýaqytta ministrlik 17 joǵary oqý ornyna jospardan tys tekserýdi bastady jáne jyl sońyna deiin tekserýlerdi josparly túrde júrgizetin bolady. Árine, bul jerdegi eń basty másele, JOO-lardyń bilim berý baǵdarlamalaryn sapaly daiyndaýyna bailanysty. Sol bilim berý baǵdarlamasyn aiaqtap shyqqannan keiin «túlek qanshalyqty jumysqa ornalasady?», «qanshalyqty suranysqa ie bolady?», osyǵan orai 5 maýsymda JOO-larǵa qoiylatyn biliktilik talaptaryna ózgerister engizildi. Kadrlardy daiyndaýǵa litsenziia alý úshin JOO-nyń baǵdarlamalary saraptamadan ótýi kerek jáne Bilim ministrliginiń oqý baǵdarlamalary tiziminde bolýy tiis», - dedi Gúlzat Kóbenova ministrliktiń Facebook-paraqshasynda ótken onlain-brifing barysynda.
Sonymen qatar komitet tóraiymy joǵary oqý oryndarynyń professor-oqytýshy quramyna qoiylatyn talaptardyń da ózgergendigin aitty.
«Endigi ýaqytta JOO oqý barysyna tájiribeli mamandardy tarta alady. Mysaly, burynǵy jyldary JOO-larda ǵylymi dárejeleri bar oqytýshylar 50 paiyzdy quraýy qajet bolsa, biyldan bastap 40 paiyzǵa tómendetildi. Negizgi shtattaǵy professor-oqytýshy quramy burnaǵy jyly 80 paiyzdy qurasa, ótken jyly 60 paiyz boldy. Endigi ýaqytta ulttyq biliktilik sheńberi aiasynda tájiribesi mol mamandardy tartýǵa bolady», - dedi ol.
