Respýblikalyq «Taza Qazaqstan» ekoaktsiiasynyń «Kieli meken» aptalyǵy Taldyqorǵandaǵy Iliias Jansúgirovtyń eskertkishinen bastaý aldy.
Elimiz boiynsha júrip jatqan kóktemgi ekologiialyq bastamaǵa I.Jansúgirov atyndaǵy Jetisý ýniversitetiniń stýdentteri qazaq poeziiasynda óz orny bar aqynnyń óleńin oqýmen kiristi. Aldymen qalamgerdiń kópshilikke belgili jyryn oqyǵan bilimgerler igilikti sharany eskertkish turǵan aýmaqty tazalaýmen jalǵastyrdy.
Aqyn eskertkishi turǵan skver beker tańdalmapty. Sebebi, Jetisý jerin jyrǵa qosyp, tumsa tabiǵatty sózben sýrettegen aqyn, dramatýrg, prozashy, feletonshy, satirik, jýrnalist jáne aýdarmashy Jansúgirovtiń biyl týǵanyna 130 jyl tolyp otyr eken. Bul týraly «I.Jansúgirov atyndaǵy Jetisý ýniversiteti» kommertsiialyq emes aktsionerlik qoǵamynyń basqarma múshesi – jastar isi jónindegi prorektor Bolat Seriev:
– Qazaqstan Respýblikasynyń Prezidenti Qasym-Jomart Toqaev elimizdiń árbir óńirindegi tumsa tabiǵatty kózdiń qarashyǵyndai saqtaý kerektigin udaiy aityp keledi. Soǵan orai baǵdarlamalyq qujattar daiyndap, júieli jumys júrgizý kerektigin tapsyrdy. Sol arqyly óskeleń urpaqtyń boiyndaǵy otanshyldyq rýhty oiatyp, patriottyq sezimin ushtaý kerektigin jetkizdi, – dep máseleniń mánisin túsindirip ótti.
Memleket basshysy júktegen mindet qalalar men aýyldardy, aýlalar men baqshalardy, kósheler men kire beristerdi ózimiz tazartýymyz kerektigin uǵyndyrady. Sondyqtan Jetisý jurtshylyǵy tabiǵattyń tazalyǵyn aldyńǵy orynda ustaidy.
