Foto: Videodan skrinshot
QR Syrtqy ister ministrligi quzyretti organdarmen birlesip, shielenis aimaǵynan azamattardy shyǵarý boiynsha alǵashqy evakýatsiialyq reisterdi uiymdastyrdy, dep habarlaidy Ult.kz.
Almaty-Masqat-Almaty baǵyty boiynsha eki reis josparlanǵan.
Seisenbi kúni tańerteńgi ýaqytta 278 qazaqstandyqtan quralǵan alǵashqy top Dýbaidaǵy QR Bas konsýldyǵynyń qyzmetkerlerimen birge Masqatqa qarai jerústi kóligimen jolǵa shyqty. BAÁ jáne Oman shekarasynda azamattarǵa shekaralyq rásimderden jedel ótýdi qamtamasyz etý úshin konsýldyq qoldaý kórsetildi.
Keiin osy baǵyt boiynsha 189 qazaqstandyqtan turatyn ekinshi toptyń ushýy josparlanǵan. Osylaisha, jalpy sany 467 Qazaqstan azamaty elge oralady.
Áýe reisterinen bólek evakýatsiia jerústi baǵyttary arqyly da júzege asyrylýda. Atap aitqanda, Qazaqstannyń Tegeran, Ashhabad jáne Gorgandaǵy mekemeleri Iran-Túrikmenstan shekarasyndaǵy «Inchebýrýn» ótkizý pýnkti arqyly 15 QR azamatynyń qaýipsiz ótýin qamtamasyz etti. Olarǵa ári qarai Aqtaý qalasyna jetýine qajetti qoldaý kórsetildi.
Sondai-aq, Tegeran jáne Erevandaǵy diplomattar Iran aýmaǵynan «Zarkýh» kompaniiasynyń 35 qyzmetkeriniń Iran-Armeniia shekarasy arqyly avtobýspen shyǵýyna járdem kórsetti.
Óńirdegi Qazaqstannyń diplomatiialyq ókildikteri evakýatsiia tolyq aiaqtalǵanǵa deiin sol jerdegi jumysty úilestirýdi jalǵastyryp, azamattarmen turaqty bailanysta bolýda.
